WILLEMSTAD.-Djadumingu último durante un Santu Sakrifisio di Misa i un resepshon, a konmemorá e echo ku Sentro di Bario Santa Maria ta selebrá e aña aki su di 60 aña di eksistensia.

Pastor Curtis Meris, durante di su predikashi, a mustra riba e importansia pa traha riba un base sólido pa por sigui edifiká riba kualke kos ku nos ke logra den bida. Ku esei el a tira lus i dediká palabranan di apresio na tur e voluntarionan ku atraves di seis dékada a traha, via di e sentro di bario, pa e bario di Santa Maria. Tambe pastor Meris a elogiá e bon trabou ku e direktiva aktual ta hasiendo.

Misa ta kompletamente yen, i banda di miembronan di e direktiva di e sentro di bario, por a nota presensia di Minister pa Desaroyo Sosial, Labor i Bienestar, Ing. Hensley Koeiman i presidente di parlamento, sr. William Millerson. Despues di e Santu Sakrifisio di Misa a sigui un resepshon na e sentro di bario kaminda, banda di Minister Koeiman, alabes e presidente di Sentro di Bario Sta. Maria, sr. Frank Mathilda i sr. Junny Sluis, presidente di UNSEBAKU a hiba palabra na e invitadonan presente. E resepshon a kontinuá ku un almuerso, músika bibu i interkambio den un ambiente hopi ameno na e sentro di un di e barionan di mas grandi di Kòrsou.