WILLEMSTAD.- Ku e meta pa yuda duna oportunidat na hóbennan pa praktiká, Fundashon Pro Souax ya pa añanan ta koperá ku diferente tipo di skol avansá di Kòrsou pa laga hóbennan hasi nan stazje na Sentro di bario Souax. Komo organisashon di bario ku ta konsentrá riba trabou sosial, Fundashon Pro Souax ta di opinion ku irespekto e nivel i tipo di preparashon di e hóben aparte di haña oportunidat i guia pa buta den práktika e loke e ta siña, ta bon pa e hóben den su periodo di stazje keda motivá tambe pa ta boluntario i hasi trabou sosial. E stazjèr na Sentro di bario Souax aparte di e oportunidat pa train loke e ta studiando pe, ta eksperensiá tambe di aserka kiko ta nifiká ta boluntario i kon importante ta pa desinteresadamente duna na otro.
Ta ku satisfakshon tur biaha di nobo direktiva di Fundashon Pro Souax ta mira kon e stazjèr durante su periodo di stazje ta envolví su mes pa eksiliá den loke e ta studiando pe pero tambe ku kuantu motivashon e ta yuda komo boluntario. Un biaha mas esei tabata e kaso resientemente ora ku e hóbennan Abigail Janzen i Rayginon Zinhagel stazjèrnan di VSBO Juan Pablo Duarte eksitosamente a kore nan stazje na Sentro di bario Souax. Manera ta e kaso ku tur stazjèr ku konkluí nan stazje eksitosamente, direktiva di Fundashon Pro Souax na final a entregá ámbos alumno un sertifikado komo rekonosementu.
Entrega di e sertifikado na e okashon aki tabata na enkargo di sra. mr. Tahirah Servilia - de Lanoy, un hóben boluntario di Fundashon Pro Souax i Sentro di bario Souax ku for di su temporada komo alumno di skol sekundario i studiante di universidat i último añanan tambe komo profeshonal, ta forma parti di e tim fiho di boluntarionan di Sentro di bario Souax. Direktiva di Fundashon ta deseá ámbos hóben éksito ku nan estudio i ta informá ku manera semper Sentro di bario Souax ta disponibel komo sitio di stazje pa nos hóbennan.

...Stazjèrnan di VSBO Juan Pablo Duarte Abigail Janzen i Rayginon Zinhagel den kompania di sr. mr. Juny Sluis presidente di Fundashon Pro Souax i sra. mr. Tahirah Servilia-de Lanoy boluntario di Fundashon Pro Souax despues di a kaba di risibí nan sertifikado...

...Direktiva i boluntarionan di Fundashon Pro Souax huntu ku stazjèrnan di Juan Pablo Duarte...