WILLEMSTAD.- Resientemente Krus Kòrá Kòrsou a selebrá apertura ofisial di su edifisio nobo, esta e Sentro Operashonal nobo di e organisashon na Suffisant. Esaki a tuma lugá na momentu ku su ekselensia gobernador di Kòrsou sra. Lucille George-Wout a kòrta e sinta huntu ku presidente di Krus Kòrá sr. Alfred Palm i 2 boluntario i asina realisá e inougurashon ofisial. Boluntarionan di Krus Kòrá Kòrsou ta di húbilo ku un sentro operashonal nobo despues ku un kandela feros a destruí e edifisio anterior dia 28 mei 2020.

Manera presidente di Krus Kòrá Kòrsou sr. Alfred Palm, kompañá pa e direktiva di e organisashon a duna di konosé, ‘No hay mal que por bien no venga’. Krus Kòrá ta para pa 7 prinsipio ku ta
1. Nos ta traha pa Humanidat; 2. Nos ta Imparsial; 3. Nos ta Neutral; 4. Nos ta Independiente; 5. Nos ta traha riba un base Boluntario (sin ningun interes); 6. Nos ta traha den un Unidat; 7. Nos ta traha riba un base Universal. E momento ku a kandela a destruí e edifisio anterior tabata nèt mei mei di pandemia di covid, momento ku boluntarionan tabata preparando paketenan di kuminda i higiena pa esnan den nesesidat. Danki na Hulanda ku a pone e konfiansa den Krus Kòrá Kòrsou pa e tarea grandi aki. Ta na Kòrsou a krea karchinan di sosten pa fasilitá famianan bai nan supermerkado mas serka pa buska produktonan di nesesidat. Danki na Refineria di Kòrsou i Refineria Isla ku a fasilitá ‘Man Camp’ di manera ku por a sigui prepará paketenan di nos komunidat ora ku e sentro operashonal na Suffisant tabata kompletamente destruí.

Nèt un aña pasá Reunion General di Krus Kòrá Kòrsou a duna aprobashon pa firma akuerdo di konstrukshon ku kontratistanan Frens Construction, Gewi Technical Services i Simplair anto manera pronostiká despues di un aña e edifisio ta kla. Ta trata di un invershon sumamente grandi pa Krus Kòrá Kòrsou (3 mion florin). Ta bon pa bolbe enfatisá ku Krus Kòrá Kòrsou no ta risibí niun sorto di supsidio. E organisashon mas grandi di boluntario ta dependé di donashon for di komunidat banda di kontribushon ku ta generá ku kursonan di EHBO i kontribushon ku ta pidi pa asistensia na eventonan masal públiko.
Krus Kòrá Kòrsou ta rumbo pa su di 93 aniversario i p’esei palabranan di gradisimentu pa e sosten i awor mas ku nunka e petishon ta bai na nos komunidat kompletu pa konsiderá kontribushon na Krus Kòrá Kòrsou den forma di donashon pa asina e organisashon di boluntario aki por sigui yuda.

E edifisio operashonal nobo na Suffisant ta bai sirbi pa próksimo 30-50 añanan unda por duna preparashon na e boluntarionan, pa nan ta semper bon prepará den ehekushon di nan trabou.

Preparashon i ehekushon di trabounan di alivio den kaso di kualke desaster òf kalamidat tantu na Kòrsou komo otro islanan den serkania. E edifisio ta sirbi tambe pa asistí komunidat pa bira mas resiliente. Tin instruktornan sertifiká ku ta duna kursonan di EHBO na individuo i instansianan. E edifisio ta sirbi komo un sentro multifunshonal pa bario i área kompletu.

Yudansa di komunidat ta hopi nesesario pa Krus Kòrá Kòrsou. Tin un flota di 5 ambulans ku dentro di sierto tempu mester keda remplasá. Tur donashon semper ta bon biní riba MCB #2004. Na komienso di 2024 e organisashon aki lo ta riba plataforma di Sentoo ku lo hasi e sistema mas fásil i práktiko pa hasi donashon.

Palabranan di gradisimentu a bai na miembronan di Krus Kòrá, tambe Henky Stomp miembro 56 aña dunando servisio di kua 23 aña komo ‘collone commandant’. Awor komo ‘project manager’ pa e edifisio nobo el a hasi tremendo prestashon. Tambe a yama danki na Krus Kòrá Hulandes, Cheyenne Ranis, Mika Matos de Leon, Frens Construction, Gewi Technical Services, Simplair, Brakel Caribean i Design House. Un danki di kurason ta bai na tur individuo i organisashonnan ku yuda nos realisá nos edifisio aki na Suffisant.