No ta na nodi mas lei pa kombatí pobresa

WILLEMSTAD.-Konseho Sosial Ekonómiko (SER), den un karta fechá 27 di yanüari último ta duna su punto di bista riba un petishon ku Parlamento a manda pa SER. Ta asina ku parlamentarionan, miembro di e frakshon di PAR, dia 7 di oktober 2020 a entregá un inisiativa pa un proyekto di lei pa medio di kua nan ke kombatí pobresa na Kòrsou di forma integral.

Manera SER ta splika, e parlamentarionan ku a tuma e inisiativa aki ke logra un aserkamentu integral di e pobresa kresiente eksistente i kresiente kombiná ku eksklushon sosial na Kòrsou. SER mes a bai hasi análisis di e nifikashon di pobresa den e konteksto internashonal i kon esaki ta relatá ku e situashon den Union Oropeo. Ta sali na kla ku tantu pa Nashonnan Uni komo Union Oropeo,  ta komprondé e ku pobresa tin un karakter multi dimensional den kua banda di e aspektonan material tambe ta importante e eksklushon sosial. Esaki ta trese divishon entre esnan pober ku e esnan ku por tin un nivel di bida basá riba patronchinan di bida establesé.

Kombatimentu di pobresa tin un lugá prominente den e metanan duradero, asina yamá Sustainable Development Goals. Den e lista di SDG’s, esun promé ta bisa ‘No poverty’. SER ta opservá ku pa atendé ku e problema di pobresa mester atendé ku maneho. Asta ta asina segun SER, ku ta mas importante pa tin bon maneho dirigí pa kombatí pobresa enbes di legislashon (lei). Ku otro palabra ta importante pa implementá maneho pa atendé kombatimentu di pobresa.

Tur kos ta kuminsá ku un maneho pa kombatí pobresa sólido. E programa di gobernashon 2017 – 2021 ta pone énfasis riba un komunidat inklusivo, ku kreamentu di kuponan di trabou komo un di e prioridatnan mas importante i meskos kombatimentu di pobresa.

Pa e motibunan ei i vários mas SER ta konsehá e parlamentarionan di PAR ku no ta nesesario pa traha leinan nobo pa kombatí pobresa, pero mas bien kontrolá gobièrnu mas severo i keda mustra ta unda gobièrnu ta fayando. SER ta kere ku aktualmente ta falta un maneho Ekonómiko dirigí. Mas detaye den edishon di EXTRA.