WILLEMSTAD – Ni e ordenansa di lei pa kolektá impuesto (“invordering”) manera minister di Finansa, Javier Silvania a manda pa parlamento ni otro ordenansanan di leinan fiskal no tin un areglo ku ta duna minister di Finansa e outorisashon pa duna eksonerashon di pago di impuesto (“buiten vordering stellen”). For di esaki por konkluí ku minister di Finansa ni den su ròl komo legisladó i ni komo ehekutivo por a tuma e desishon legítimo bálido pa duna eksonerashon di pago di debe di impuesto.

Ta bin aserka ku e minister no a tene su mes na e práktika fiho na Kòrsou pa duna un “aanschrijving” ora ta tuma medidanan temporal pa sanea debe di impuesto antisipando riba un areglo legal. Asina Konseho Sosial Ekonómiko (SER) ta trese dilanti den su konseho riba e ordenansa di lei ku Silvania a manda pa parlamento.

Tambe SER ta konkluí ku Silvania a tuma medida pa sanea debe di impuesto sin un base hurídiko. E ponensia aki segun SER ta haña sosten tambe den e intenshonnan di Silvania pa formalisá su pakete di medida ku el a tuma pa medio di e ordenansa di lei ku el a manda resien pa parlamento.

SER ta mustra ku departamento hurídiko di gobièrnu (WJZ) ta bisa ku por por legalisá e medidanan di impuesto despues, solamente si den pasado a anunsiá e medidanan aki. “Den kaso ku no a publiká e medidanan aki WJZ ta konsehá pa no hasi esaki den un ordenansa di lei despues, manera e minister ta proponé.”

Regla medidanan di impuesto den un ordenansa di lei apart ku tin un karakter temporal no ta kuadra ku  aserkamentu integral di e diferente fasenan di e proseso pa kobra impuesto i pa e motibu aki SER ta kere ku e medidanan aki mester ta den un ordenansa di lei regular relashoná ku kolekshon di impuesto pa garantisá integridat di tur  medida pa un kontròl efektivo di debe di impuesto.

Silvania despues di a duna deskuento riba debe impuesto na esnan ku disidí di paga parti di e debe aki i seguidamente asta a eksonerá tur debe di impuesto di 2017 i promé, a manda un proposishon di lei pa parlamento pa duna un kuadro legal na su desishonnan. SER ta indiká ku normal ta asina ku ta eksonerá evaluashonnan di impuesto (“aanslagen”) ku ta imponé kaba i ku ta mínimo 5 aña bieu.

SER ta bisa ku el a konstatá diferente defisiensia den e anunsionan públiko di entre otro e strategia pa maneho di debe di impuesto i prinsipionan di strategia ku mester kompaña esaki. Tambe SER ta haña ku mester por krea den komunidat un base di konfiansa mas amplio pa servisio di impuesto i Ontvanger si na un manera transparente duna un bista di e efektonan di e pakete di medida pa sanea debe di impuesto.

E embergadura di e medida di impuesto manera deskribí den e konsepto di lei ta mas amplio ku lokual sa apliká normalmente, SER ta sigui bisa. E medida di impuesto ku minister Silvania a konta sinembargo pa tur evaluashon di 2017 i mas bieu.

Segun SER e maneho amplio aki no ta kuadro ku práktikanan internashonal. Alabes SER ta haña ku e desishon pa entrante 28 yanüari 2023 kita e outorisashon di inspektor di impuesto pa no imponé evaluashon di impuesto riba añanan 2017 i mas bieu tin konsekuensianan ku ta bai hopi leu.

Entre otro ta eksonerá tambe evaluashonnan resien imponé i imponé anteriormente a base di kua a sera areglonan di pago.

Foto:

...Javier Silvania...