WILLEMSTAD.-  SER a saka un konseho pa e Minister di Desaroyo Sosial, Labor i Bienestar (SOAW) tokante e proposishon pa apliká un deskuento adishonal di 10% riba e pagonan ku segun e ordenansa di Penshun di behes (AOV) i esun di Penshun di biuda i wérfano (AWW), ta wòrdu pagá na no-residentenan di Kòrsou.

E medida aki ta un kontinuashon di e esfuersonan ku pa basta tempu Gobièrnu ta bin ta hasi, pa garantisá e pagonan di penshun di behes i tambe e pagonan di penshun di e biuda i wèrfanonan pa motibu di e eskases kresiente di e fondonan sosial.

E no-residentenan a haña nan kaba di tin di aber na aña 2017 ku un deskuento di 10% riba nan penshun di behes i tambe riba e penshun di biuda i wérfano. E argumento di e promé deskuento aki tabata e tempu ei, ku e no-residentenan ta kontribuí ku ménos ku 30% na e ekonomia lokal kompará ku e residentenan. Esaki pasobra nan no ta kontribuí na e fondonan Lei di Labizjan (AVBZ), Impuesto di benta (OB) òf e Balor agregá brutu (BTW) di e pais.

Ser ta bisa ku e proposishon pa e di dos deskuento Gobièrnu lo purba trese e fondonan di penshun di behes i esun di e penshun pa biuda i wérfano den balansa, sin ku den práktika esaki lo mester nifiká un subida di e kontribushon di e pais na e fondo.