Dia di tata ku Promé Minister Eugene Rhuggenaath. Kon e ta selebr’é i kiko dia di tata ta nifiká pe. Den su kurá sintá, ku su tres yunan prinsipalmente e dos chikínan ta kore bai bin, el a konta nos kuantu amor a brota den dje ora el a bira tata, ku su promé yu, su prinsesa Sophia.

“Ta un bendishon pa tin un famia i tin yu. Mi por bisé awor aki ku satisfakshon pero tempu mi tabata hóben nunka mi a pensa. Semper mi a pensa di traha duru, mi tabatin otro ambishon i yu ku kasá no tabata pas den esei. Pero mi a topa mi señora i mi pensamentu a kambia”, el a bisa ku un sonrisa. Sr. Rhuggenaath a splika kiko e ke men ku yu ta kambia asta bo pensamentu. Antes ora e tabata biaha i e tende un yu ta grita riba avion e ta pensa ku esaki no por, pero awendia e ta tend’é yora riba avion i e ta pensa den su mes “hei beibi”, pero ku un smail. Esaki ta e manera ku bo ta eksperensiá famia.

Kon lanta,mi yunan...

Riba e pregunta ku si e ta lanta su yunan manera e mes a lanta el a bisa nos di Djasabra ku naturalmente el a siña hopi di su mayornan. Tur dos a lanta den kas humilde. Su tata a lanta den kas na Buena Vista formando parti di 8 ruman ku un mama soltero i tur hende mester a duna man na kas. Pero e ta purba di wak pa hasié otro. El a pone pa su mes pa duna amor i mustra ku ta masha normal pa brasa sunchi i ekspresá amor pa kasá i yunan. Tempu el a lanta esei no tabata asina normal. I esaki prinsipalmente pa e figura di tata i yu hòmber manera hopi biaha hende ta pensa.

Riba un dia liber....

Riba un dia liber, riba un dia di tata e ke pas’é ku su yunan. Riba dia di tata ta un dia pa ta huntu. Su yunan a kustumbrá di traha desayuno pe, e no sa e biaha aki ku nan lo hasié mañan dia di tata. Ku e trabou ku e tin hopi peso ta riba su kasá awor aki i wikènt e ta purba pa tei i djadumingu sigur e ke ta na kas ku su famia.

Tata ta importante...

Un tata ta masha importante pa un famia. Si e wak su hubentut ku su mama ku a sòru pa nan i traha mitar dia, su tata tambe a sòru pa nan na su manera tresiendo poko òrdu. E amor nan a haña di tur dos banda i ta importante pa e balansa pa tin tur dos den kas. Awor aki komo e ta promé minister, e tin un trabou pisá riba dje pero ora e ta na kas su kasá sigur ta kòrd’é pa e sòru di tei realmente presente pa su yunan i e momentunan importante kaminda e tin di duna sosten i guia, e ta sòru pa e tei.

“Mi mes ta mama i tata” ta un ekspreshon ku por tende hopi. Eugene Rhuggenaath a reakshoná riba esaki di e siguiente forma; “Mi ta kompartí esei pasobra e ta un realidat, un realidat den nos komunidat, e realidat pa un famia ku ta keda enkabesá pa un hende muhé ku tin dos tarea pero tin balansa den e ser femenino i maskulino ku mester tei den kas di un forma òf otro. Hopi biaha ta un tio òf ruman grandi ta yena esei. I p’esei mi mester tei komo tata pa duna kontenido na mi yunan ounke e imágen ku nos tin di hende hòmber i tata ku ta esun fuerte i strèn no semper mester ta asina. Mi por siña di mi yunan. Un yu ku no ke obedesé ántes ta keda atendé ku un kara serio. Pero kosnan a kambia. Mi a pasa den dje ku mi yu i ora e yu a splika mi a komprondé. E yu tin su mes pensamentu i sentimentunan i ta bon pa skucha kiko ta biba den dje. E tatanan ku ami a konosé tempu mi tabata chikí no ta nifiká ku mi mester ta meskos i bo tin di wak kon ta adaptá na e manera moderno”.

E ròl a desaroyá....

Por mira asta e ròl di e muhé i hende hòmber den boka di trabou, e situashon di hende muhé i hende hòmber a desaroyá. I na kas di famia tambe tin balansa mas perfekto den sentido ku mirando e demanda pa forma i duna guia na un yu den ambiente moderno ku mas aktividat i influensianan di entre otro media sosial, kaminda kosnan ta bai mas rápido, i ta trese kuné ku ta huntu mayornan tin di hasié. I e hende hòmber tambe tin di kumpli ku tareanan manera kita paña for di waya,  laba tayo. Esaki sigur no ta hasi niun hende hòmber ménos hòmber, segun sr. Rhuggenaath. Ounke bo ta hende hòmber bo mester tei i konektá emoshonalmente ku bo yunan i e parti di guia spiritual tambe ta importante, ku kisas e hende hòmber ántes no tabata hasi.

“Love at first sight”....

Komo konseho na e hende hòmber ku ta tata kaba òf esun ku ta bai bira tata, promé minister Rhuggenaath a bisa ku for di ora e yu nase ta importante pa bo tei presente. I ku presente no solamente físikamente pero ku tur aspekto manera amor, guia i sosten i kaminda mester duna e kuadronan pa e yu sa den ki espasio e tin pa desaroyá. ‘Mi por bisa ku nunka mi a pensa di ta tata pero e ta un bendishon. M ta kòrda tempu den konseho insular, tempu mi promé yu ta bai nase, un miembro kolega a bisá mi ku ora bo yu nase esei ta berdaderamente “love at first sight”. E konekshon ei bo tin di sa di mantené. Tene kuenta semper ku e manera kon bo ta atendé ku bo yu ta afektá su personalidat.

Importante pa tata tei....

Awor aki tin hopi preshon riba mayornan. Antes tabatin wela i tantanan pa pasa dia serka dje pero awendia mayornan ta traha mas, famianan ta masha individual i e preshon a subi p’esei ta importante pa tatanan tei. I no ta asina ku e hòmber mester ta e machu i fuerte. Nos tur tin e parti femenino i maskulino i  e no ta hasi bu ménos hòmber. E no ta hasi bu ménos hòmber pa skohe pa no sali ku bo amigunan i keda kas ku bo yunan, palabranan di promé minister Eugene Rhuggenaath.