Ivesona Antonia

Artista spesialisá den Icono

 

Magna Mater ta un proyekto ku nos lo bai sera konosí kuné den luna di òktober. Ta un eksposishon, kombiná ku músika i Chiwewe...aha...kiko ta Chiwewe. Tur esaki Ivesona Antonia, kariñosamente yama Ive a konta Djasabra. Ku un ekspreshon di pashon pa su trabou, Ive a konta nos ku Magda ta nifiká Grandi i Mater ta mama esta e mama grandi òf e gran mama. Dor ku e ta pinta Icono, ora e ta kla i pone su kolekshon huntu el a ripara ku tur kos ta Maria. E ta pinta Icono Ruso Ortodoxs i nan no konosé e nòmber Maria pero Moeder Gods ku ta nifiká mama di Dios. Pa Ive no yama e proyekto Maria òf mama di Dios el a yam’e Magna Mater. El a hasi un investigashon riba e nòmber i dikon e ta pinta Maria so. I el a topa asina tantu kos, ku dado momentu e di ku esaki mas hende mester sera konosí kuné i p’esei el a hink'é den un proyekto pa asina mira ku e por laga otro hende tambe konosé i ku kosnan ku Ive tambe a topa den e investigashon.

E nòmber Ive ta bin di Ivesona i su primanan a haña mas fásil pa yam’é Ive. El a nase na Montaña, biba na Montaña i el a bai skol na Punda pasobra su mama no tabata ke pa nan bai skol pòrnada. Di einan el a kaba skol i a bai MIL i a bira maestro. Pero dado momentu el a haña chèns di bai Ulanda pa hasi ‘Hoofdacte’. Einan el a sera konosí ku un otro tipo di enseñansa ku ta esun pa muchanan mentalmente retardá, kual a fasin’é. Ive kier a drenta enfermeria pa e traha ku e tipo di hendenan ei. El a kambia di enseñansa i drenta enfermeria i siña spesial pa ku dia muchanan ku desabilidat mental. Ive semper a gusta pinta i na Ulanda el a sigui pinta. E kier a pinta semper potrèt i el a bai kurso pa esei. Un biaha el a bai un tayer i einan e dosente a mustra un potrèt ku el a pinta di un hende hòmber bieu i Ive kier a siñ’é. I e téknika ei yama Ei Tempera. I pa esei mester siña pinta Icono i asina Ive a spesialisá den pinta Icono ku no ta nada fásil ni barata.

Téknika di pinta Icono....

Ta un téknika ku parse simpel pero su materialnan ta karu. I pintamentu di Icono ta ku kosnan simpel. Bo ta haña un tabla i riba e tabla un paña, pone kalki i despues ta bai pinta. I bo tin di pinta ku e fèrf ku bo mes a traha i e fèrf ei yama Ei Tempera. E ta traha di dòl di webu i Ive ta pone biña blanku i usa pigment. I e reseta ei ta esun pa traha bo mes fèrf pa pinta Icono.

E kurso ku Ive a bai pa siña pinta Icono ta unu kaminda e tin di drenta konbento pa un siman. Ive a hasié pa un siman largu i e ta pinta dia dia i anochi. El a gusta asina tantu ku el a sigui bai konbento tur aña. Despues di su estudio el a bira enfermera i trahando el a bai lès di bira leraar verpleegkunde. Ive semper a keda ku e maestro den dje. El a sigui ku su hòbi i siendo 35 aña na Ulanda el a keda bin Kòrsou tur aña.

Magna Mater ta habri 1e di òktober. E proyekto aki a nase di e forma aki; Ive tin su pinturanan i semper al e bisa ku e ke pone su pinturanan di Maria nan so den un eksposishon. I biniendo un konsierto na Skèrpènè el a mira e kapèl i a hinka den su kabes ku ta einan e kier hasié. Ta un espasio hopi grandi i p’esei Ive a aserká otro artistanan ku por tin algu di aber ku Magna Mater pa pone aserka. E mama ta kuminsá for di e promé hendenna na mundu i semper ta hende muhé ta esnan mas elevá. Tur hende ta adorá hende muhé. Hende tabata konosí Dios pero semper tabatin e Diosa ei i esei awor ta solamente Maria tin. Den su investigashon el a topa tur esei i el a pone nan tur den e proyekto Magna Mater. Promé e mester tabata un eksposishon so, pero mirando su embergadura el a disidí di pone músika tambe aserka. I asina e nòmber a bira Magna

Mater. Den e eksposishon tin tur loke tin di aber ku e mama grandi.  Ive tin vários artista ku a reakshoná i el a buska músika. E ta hasi tur kos ku tin di aber ku e palabra maria. I p’esei e ta un proyekto i no un eksposishon so. E ta un proyekto ku ta enserá arte visual esta e eksposishon, arte di palabra ku ta e Chiwewe i tin lekturanan ku ta keda tene i arte di músika. Lo bai tin tur kansion ku tin e palabra maria aden.

Luna di òktober luna di amor...

No ta pòrnada Ive a skohe luna di òktober pa e proyekto. Luna di òktober ta luna di amor, ta luna di flor i luna di Maria. Hasiendo e proyekto den luna di òktober e ta trese bek e rekuerdonan di pasado. El a mira hopi pareha forma den e luna di Love, e luna di òktober. Ta henter luna di òktober ta dediká na Maria. Ora e tabata buskando músika, Harry Moen ta esun ku a bin ku Chiwewe. Ive no tabata mesora kiko ta Chiwewe pero hasiendo informashon el a haña sa.

Chiwewe...

Henter òktober ta lesa rosario i novena i e lastu siman di òktober na Flip Banda Bou tabata tene un novena na kas di un hende i despues di e novena tin e kibramentu di altar. I tabatin bebementu di kòfi i te i un enkuentro chikí. Tabata bin un hende bin konta kuenta i tin e sistema di kanta kuenta i un sistema di konta kuenta i pidi boka i einan ta grita Chiwewe i esun ku grit’é ta esun ku ta sigui ku e kuenta. Ta esei ke rebibá den e proyekto, E proyekto Magna Mater ta unu kultural históriko i kier a hinka historia i kultura den dje pa mustra kiko tabata hasi e parti di kultura na Kòrsou.

Ta buskando un banda...

Segun e splikashon di Ive ta buskando un banda ku por trese e kansionnan ku tin di aber òf ku tin e nòmber Maria den dje. Maria ta den kushina, ta waya kandela..... i hopi mas ta loke nos konosé ku e nòmber Maria den dje. Tabatin un banda den prinsipio pero nan a haña nan stroba pa e parti di finansa i no por presentá mas durante di e proyekto Magna Mater.

Na Skèrpènè....

E proyekto kompleto, tantu e parti di eksposishon, e parti di músika i e parti di Chiwewe, tur ta tuma lugá na Skèrpènè. Na e edifisio kaminda ántes fraternan tabata i ku aktualmente a keda renová, e ta sumamente bunita i e ta parti di historia i kultura di Kòrsou. Na Skèrpènè ta hopi intelektual di Kòrsou a pasa nan tempu i ta un pida ku no mester bai pèrdí. E proyekto su apertura ta dia 1 di òktober mitar di 8 anochi den kapèl. Kuminsando dia 2 por bishitá e eksposishon di 9 or di mainta pa 2 or di atardi i tur djamars den òktober, pero kuminsando 9 di òktober tin un lektura. E lektura ei lo ta “for di mama primogenio te ku mama Maria”. E siman di 16 di òktober lo tin un charla tambe hasi dos di Rosemary Ellen i e lo duna charla riba “Deboshon di maria den siglo 20 na Kòrsou; un análisis antropológiko”. Dia 23 di òktober lo tin Geraldine Isenia ku sa tur tur kos over di Maria i e charla yama Maria Icono di Iglesia. I e último djamars di òktober i ku ta e último dia di e eksposishon lo tin Chiwewe na enkargo di Merly Augusta.

“Ku hopi amor mi ta invitá pueblo di Kòrsou pa bishita nos proyekto, Aki nan por mira kon hopi artista a traha riba e proyekto. Un di e artistanan ku mi por menshoná ta Ced Ride i diferente pintor i artista ku ta trese nan trabou pa nos mira. Tin trabou di pintamentu so, di estatua i tin un parti kaminda nos ta trese e devoshonarianan esta kosnan di ántes ku hende tabata adorá Maria kuné. Por ehèmpel un rosario di kalbas. Mi ta spera henter pueblo di Kòrsou lo bin mira nos artistanan i bin nos lekturanan tur djamars mitar di 8 di anochi”, Ive Antonia a terminá.