WILLEMSTAD.-Un hòmber di 32 aña di nashonalidat surinameño ta sera for di 1 di yüni pa ladronisia di outo. Ayera e ta haña mas akusashon riba su nòmber, respektivamente poseshon di arma di kandela. E último ei polis a informe di dje ayera.

Relashoná ku tantísimo ladronisia di outo na Kòrsou, tin un tim spesial di polis hasiendo investigashonnan. Un investigashon ku polis tabata hasi relashoná ku ladronisia na luna di yanüari e aña aki, a detené e hòmber surinameño MIA dia 1 di yüni.

E detenshon a tuma lugá den Kaya Renbak den oranan tempran di mainta. Riba e dia ei a konfiská algun artíkulo ku ta di importansia pa e investigashon den un entrada hudisial na e adrès menshoná.

A presentá e sospechoso dilanti di un fiskal ouksiliar ku a ordená su enkarselamentu pendiente di mas investigashon.

E tim a sigui investigá i dia 1e di yüli último a konfiská dos outo prosedente di ladronisia. Ta trata di un Kia Forte shinishi i un Nissan Versa shinishi. A konfiská e outonan aki den respektivamente Gato i Kaya Renbak.

Konfiskashon di e vehíkulonan aki ta relashoná ku un detenshon ku e tim a realisá dia promé di yüni último, unda a hasi detenshon di e hòmber sospechoso M.I.A. di 32 aña di edat nase na Sürnam.

Ayera polis ta informá ku a presentá otro kaso kontra di e sospechoso/detenido MIA. E tim enkargá ku investigashon di ladronisia di outo a detené (e ta sera kaba) e hòmber sospechoso M.I.A. nasé na Sürnam di 32 aña di edat.

E hòmber akí ta detené na prisòn SDKK i e ta sospecha awor tambe pa poseshon ilegal di arma di kandela.