ISLA ta refutá insinuashon ku nan ta tuma revancha

WILLEMSTAD.- Refineria Isla no tin niun klase di akshon kontra di trahadó ni kontra di studiantenan den e skol vokashonal (bedrijfschool). Loke ta pasando ta simplemente ku no tin sèn i mester tuma e medidanan nesesario. E prioridat ta na e momentunan aki pa tene e refineria habrí i mantené e kuponan di trabou aktual intakto. No tin nada di ningun revancha kontra ningun hende. Di e forma ei e bosero di Refineria Isla Earl Balborda a hasi su deklarashon na EXTRA pa kontrarestá informenan eróneo ku ta kore riba retnan sosial.

Den oranan di mèrdia un persona ku ta bishita e skol vokashonal a saka potrèt di un partisipashon na e studiantenan. E informashon ta bisa e.o ku Refineria Isla a disidí ku lo no laga e studiantenan kaba nan trayekto pa bira ‘operator’ na e momentunan aki. Dia 15 di mart próksimo lo ta e último dia ku e studiantenan aktual ta forma parti di e skol vokashonal. Ta informá ku e studiantenan lo kobra fin di febrüari i mitar luna di mart. Isla lo entrega sertifikado pa e parti teorétiko. Isla lo NO kobra e studiantenan e sobra sèn ku falta pa e laptop. Den mesun rosea ta splika ku den kaso ku tin klaridat di futuro i ku refineria ta sigui operá normal i ku krudo ta drenta i tambe ku CUROIL ta tuma TUR produkto, lo pidi esnan ku ta disponibel pa sigui ku e programa. Kualke studiante ku haña trabou promé ku 15 mart, Isla lo koperá pa e bai mas tempran. Tambe Isla lo yuda pa studiantenan haña trabou na otro kompanianan. Isla lo yuda esnan ku ke kuminsá otro trayekto di formashon. Isla lo skibi karta di rekomendashon.

Earl Balborda ta enfatisá ku awor aki tabata e momentu oportuno i p’esei mester a aktua awor aki. Ta asina ku e studiantenan ta na un krusada, den sentido ku nan a kaba e parti teorétiko i ta prepará pa bai kuminsá e parti práktiko. A para e trayekto awor i no laga e studiantenan kuminsá ku e parti di praktiká pa despues para e trayekto mei mei di esei. E bosero ta insistí ku no tin niun akshon kontra di trahadónan, ni tampoko asuntu i niun revancha manera sierto komentarionan ta insinuá. Simplemente Isla mester wak su prioridatnan pa tene e refineria habri. No tin sèn, p’esei mester manehá konforme e situashon.