Den EXTRA su afan pa sigui informá komunidat i pa e aspekto di transparensia, entrante awe lo inisiá un un seri di artíkulo ku fragmentonan for di e Akuerdo di Gobernashon MFK/PNP pa e periodo di gobernashon 2021-2025. Aspektonan importante ku tin influensia riba desaroyo di tur tereno ku ta afektá di un forma òf otro henter e komunidat di Kòrsou. Un pueblo bon informá por opiná.

(Teksto saka for di Akuerdo di Gobernashon MFK/PNP)

Seri 12: TRAHA HUNTU KU MINISTERIO PA RELASHONAN KU EKSTERIOR

Kapitalisá mas riba trahamentu huntu e Ministerio na Hulanda
- Kada Ministerio lo mester apuntá un persona di kontakto ku huntu ku DBB i Kabinèt GevMin ta (re-) aktivá e kontakto ku ‘Directie Westelijk Halfrond’ na ‘Buitenlandse Zaken’ a base di nesesidat di kada ministerio.
- E personanan di kontakto lo fungi tambe pa kontakto ku e otro islanan den Reino Hulandes.
- Periódikamente lo mester raportá na tur ministerio kiko ta saliendo for di e esfuerso aki.
- Inventarisá e paisnan unda nos por pone un representante na embahada òf Konsulado (General) di Reino. Esaki tantu diplomátiko komo komersial. E parti aki lo sosodé den estrecho koperashon ku e ministerionan. Den e kuadro aki mester evaluá tambe e struktura i proseso interno di trabou den DBB i ‘Buitenlandse Economische Samenwerking’ (BES) pa krea sufisiente diplomátiko. Alabes mester pone mas atenshon na implementashon di tratadonan internashonal i evaluá e benefisio di un tratado komersial ku ‘Caricom’ i ku Merka.
- Mester enbolbí Kòrsou mas tantu den prosesonan ku ta trata formulashon i establesimentu di akuerdonan internashonal ku ta regardá Kòrsou tambe.
- Mester inventarisá tur e akuerdonan internashonal ku vigente aktualmente i averiguá kiko ta nan implikashon pa Kòrsou. Tambe si Kòrsou ta kumpliendo ku nan. Si esaki no ta e kaso mester wak kiko tin di sosodé pa kumpli òf ku mester skohe pa tuma otro posishon si esei ta posibel

Seri 13 ta kontinuá mayan ku komunikashon i informashon