Den EXTRA su afan pa sigui informá komunidat i pa e aspekto di transparensia, entrante awe lo inisiá un un seri di artíkulo ku fragmentonan for di e Akuerdo di Gobernashon MFK/PNP pa e periodo di gobernashon 2021-2025. Aspektonan importante ku tin influensia riba desaroyo di tur tereno ku ta afektá di un forma òf otro henter e komunidat di Kòrsou. Un pueblo bon informá por opiná.

 (Teksto saka for di Akuerdo di Gobernashon MFK/PNP)

 Seri 24 Fasilitá Ambiente Empresarial

Gobièrnu lo ke realisá na final di e periodo di Gobernashon un kresementu ekonómiko di por lo ménos 20-25% en komparashon ku e nivel di BBP registrá den aña 2020. Ademas Gobièrnu tin e ambishon pa baha desempleo ku 50% den 4 aña. En bes di empobresé, e situashon di kada yu di tera tin ku wòrdu drecha.

Gobièrnu lo dediká hopi atenshon i rekurso pa subi produktividat ekonómiko. Banda di esaki lo por spera un konsentrashon di esfuerso pa realmente subi eksportashon di produkto i servisionan. Esaki lo tin ku wòrdu ekspresá den nos balansa di komersio, sigui pa nos kuenta koriente i finalmente den nos balansa di pago. Mantenshon di e situashon di deterioro manera ta e kaso den e situashon aktual lo no por wòrdu tolerá, konsiderando konsekuensianan di esaki pa kada unu di nos. Den kuadro di esaki diferente reforma lo tin ku wòrdu implementá.

Labor

No tin duda ku e sektor laboral tin ku wòrdu fleksibilidat. Esaki no ta enserá un “free for all” pa por “hire and fire” konsiderando e tamaño di nos merkado i e restrikshonnan pa ku mobilidat di labor. Pero e prosesonan pa trese klaridat tin ku bira mas kòrtiku i dura ménos.

Di otro banda tambe lo tin ku adaptá e maneho i leinan konserní pa riba un base hustu por duna e seguridat nesesario na e trahadó. Prolongashon ku kontratonan i/o ku pousa kòrtiku tambe tin ku wòrdu kombatí. Mesun kos ta konta pa trahamentu largu via di ‘uitzendbureau’; e maneho i lei(nan) konserní lo wòrdu skrutiná.

Un maneho dirigí lo ser hiba pa formalisá e situashon hurídiko di tur hende ku ta traha den e sektor informal. Di e forma aki lo por desaroyá benefisio direkto pa e grupo (di “ZZP’rs) aki i di otro banda nan tambe lo tin ku kumpli ku nan obligashonnan (fiskal).

E mesun maneho aki lo ser hiba pa labor desplegá pa migrantenan ekonómiko ku poko bia ta kumpli ku nan obligashonnan. Atenshon lo wòrdu duna na no stroba esnan ku ta “lora man”, kual lo wòrdu definí despues eksplísitamente.

Merkado di Kapital

Durante último añanan i tempunan, vários entidat finansiero a haña nan den tempestat. Covid-19 a hasi kla e poko posibilidatnan ku a keda ora ku siudadanonan a ser limitá den hasi uso di servisio bankario, si nan no tin akseso na ‘internet banking’. Ademas e situashon instabil a trese restrikshon severo pa siudadanonan o empresanan por a hasi un fiansa o yega na areglo fleksibel pa ku kumplimentu di nan debe(nan). Pa motibunan di kumplimentu ku medidanan di Covid-19, vários potensial kliente no por a ni habri un kuenta na banko. Último tempu e diskushon (na Oropa) a habri si un siudadano mester por dispone di kuenta bankario riba su pais o si e ta bishita su pais di orígen ku sierto regularidat. Na Kòrsou mes, pa vários motibunan, siudadanonan a ser nenga un kuenta bankario.

Banda di esakinan por konstatá ku bankonan en general ta rígido ku kondishonnan di fiansa i haltura di interesnan ofresé no ta den liña ku interesnan ofresé mundialmente. Por último gastunan pa kada servisio duna dor di bankonan a wòrdu introdusí o ta subi riba un base basta frekuente.

Tambe e riesgonan pa duna un fiansa ta wòrdu pone na un mínimo ku hopi bia ta bira difísil pa empresarionan por inisiá ku nan negoshi ku nan ta anhelá.

Den e kuadro aki un estudio amplio lo ser hasi konhuntamente ku e Ministerio di Finansa i pa determiná kumplimentu ku nesesidatnan di potensial klientenan, nivel di kompetensia etc. Resultado di esaki tin ku determiná si tin ku hasi e  merkado di kapital mas fleksibel, pa habri akseso pa mas partido den e merkado o ku lo tin ku introdusí mas regulashon pa por respondé na demandanan di e merkado lokal.

Seri 25 Kompetensia