Den EXTRA su afan pa sigui informá komunidat i pa e aspekto di transparensia, entrante awe lo inisiá un un seri di artíkulo ku fragmentonan for di e Akuerdo di Gobernashon MFK/PNP pa e periodo di gobernashon 2021-2025. Aspektonan importante ku tin influensia riba desaroyo di tur tereno ku ta afektá di un forma òf otro henter e komunidat di Kòrsou. Un pueblo bon informá por opiná.
(Teksto saka for di Akuerdo di Gobernashon MFK/PNP)
Seri 4: TEMANAN DI ATENSHON I DI AKTUALIDAT
Kòrsou aktualmente ta konfrontando algun reto signifikante i ku ta di vital importansia pa desaroyo di nos País. E retonan aki tin reperkushon direkto riba nos siudadanonan. Ta imperativo pa for di komienso di e periodo di Gobernashon 2021-2025 e situashon aki keda diskutí pa asina garantisá ku e akshonnan nesesario ta wòrdu tumá. E temanan di mas importante ta:
Covid-19 i su aserkamentu
Proseso di Rekuperashon
Relashon den Reino
Refineria no operashonal
COVID-19
E krísis di e Pandemia di COVID-19 a inisiá na Kòrsou ora e promé infekshon a bira konosí na Kòrsou, riba 13 di mart 2020. COVID-19 a trese impaktonan grandi finansiero, ekonómiko i sosial. Aparte di esakinan, e Pandemia a pone un preshon enorme riba nos rekursonan i a konfrontá nos ku nos realidat i limitashonnan.
Salubridat
Aparte di a pone preshon riba e sistema di salubridat, esta nos hospital i otro fasilidatnan i rekursonan, Covid-19 a afektá bida di hopi siudadano i a kosta bida di un kantidat di 108 persona riba nos isla te ku 29 di aprel 2021. Bastante ta rekursonan ku a ser utilisá pa por kombatí e Pandemia, entre otro e proseso di bakunashon pa por hisa resistensia di nos Pais. Gobièrnu di Kòrsou ta agradesido na tur partner den Reino ku a aportá i kontribuí den e proseso aki.
Asuntunan Sosial
E impakto di Covid-19 a deteriorá e situashon sosial-ekonómiko di Pais Kòrsou i esaki ta visibel prinsipalmente serka e siudadanonan di ménos rekurso den komunidat. Te ku fin di mart 2021, kasi un tersera parti di pueblo di Kòrsou a bira dependiente di ayudo sosial pa por sobrebibí i riba un base regular a risibí paketenan di kuminda pa por alimentá nan mes diariamente. Den un palabra, Covid-19 a empobresé pueblo di Kòrsou. Aki tambe un palabra di gratitut ta bai pa nos partner mayó den Reino i tur e NGO’s i boluntarionan ku a sa di demostrá nan patriotismo na esnan den nesesidat.
Ekonomia
Covid-19 a kousa un reseshon na nivel mundial i na Kòrsou esaki no tabata un eksepshon. Un kantidat grandi di siudadano lamentablemente a risibí nan retiru miéntras otronan ya pa algun tempu ta risibiendo ménos entrada. Apesar di esaki Kòrsou a sa di a duna sosten, danki na ayudo di partnernan den reino, na sektor priva pa por a mantené empresanan riba pia i mayoria di nan empleadonan den servisio. Esaki pa medio di Pues, Kòrsou ta para dilanti di algun reto grandi.
Seri 5 lo toka e tema di Proseso di Rekuperashon
Laga un komentario