Den EXTRA su afan pa sigui informá komunidat i pa e aspekto di transparensia, entrante awe lo inisiá un un seri di artíkulo ku fragmentonan for di e Akuerdo di Gobernashon MFK/PNP pa e periodo di gobernashon 2021-2025. Aspektonan importante ku tin influensia riba desaroyo di tur tereno ku ta afektá di un forma òf otro henter e komunidat di Kòrsou. Un pueblo bon informá por opiná.

(Teksto saka for di Akuerdo di Gobernashon MFK/PNP)

Seri 40 Servisio na públiko

Kuater di e puntonan mas importante pa gobièrnu ta: un maneho finansiero sano, konfiabilidat di e presupuesto, konfiabilidat di e relato finansiero i pèrkurá pa persona òf instansianan tuma responsabilidat i karga konsekuensia na momento ku no kumpli ku leinan. Despues di un kampaña di informashon intensivo Gobièrnu lo pèrkurá pa drecha servisio ku ta brinda na pueblo di Kòrsou.

I. Servisio na públiko
Un di e puntonan prinsipal di e akuerdo di gobernashon di Ministerio di Finansa, ta pa mehorá e servisio na públiko / pueblo di Kòrsou.
- Reorganisashon di Inspekshon i Ontvanger
Konforme e akuerdo aki ta bini un reorganisashon di servisio di impuesto. Ta proponé pa e reorganisashon pasa den diferente fase.

Fase 1: Den e promé fase, lo reorganisá Inspekshon i Ontvanger i lo pèrkurá pa un mihó sinkronisashon. Mester alsa e nivel di servisio ku Inspekshon i Ontvanger ta brinda na nos komunidat pa medio di kursonan, un sistema di evaluashon di profeshonalnan ku ta traha na Inspekshon i Ontvanger i tambe un sistema kaminda tin un rekompensa variabel pa personanan ku ta presta mas altu ku promedio konforme e reglanan di evaluashon i kompensashon. E reglanan di evaluashon i kompensashon aki lo ta públiko pa kada un empleado di Inspekshon i Ontvanger. Di e manera aki nos por alsa kalidat di nos servisio di impuesto na un manera efisiente i transparente. Tambe lo (sigui) invertí den edukashon di e trahadónan di servisio di impuesto i kaminda ta nesesario, kontratá trahadónan kapasitá pa yuda brinda un mihó servisio na pueblo di Kòrsou.

Fase 2: Komo ku e prosesonan interno di Inspekshon i Ontvanger ainda no ta funshonando optimal, den e di dos fase gobièrnu su enfoke lo ta riba optimalisashon di e prosesonan aki. Den e fase aki lo evaluá tambe kiko ta e posibilidatnan pa mehorá e teknologianan ku Inspekshon, Ontvanger, SBAB i Duana ta usa.

Fase 3: Na momento ku e promé dos fasenan ser kompletá, lo restrukturá servisio di impuesto di moda ku Inspekshon, Ontvanger, Duana i SBAB lo bai kai bèk hirárgikamente bou di Directie Fiscale Zaken. E organisashon lo mester ser adaptá na su tarea nobo pa asina por ehersé su tarea.
- Sentralisashon di Inspekshon, Ontvanger i SBAB den un edifisio
Aktualmente tin un dibuho di e edifisionan kaminda Inspekshon, Ontvanger i SBAB lo por sinta huntu den un edifisio. E edifisio aki (tambe) lo ta situá na Regentesselaan z/n.
- Komunikashon entre servisio di impuesto i komunidat
Pa promové e komunikashon entre servisio di impuesto i komunidat di Kòrsou, e gobièrnu nobo aki ta proponé pa bini ku un kampaña, den kual servisio di impuesto ta hasi komunidat mas konsiente di su kompromiso pa paga impuesto, pero tambe di e diferente fasilidatnan ku nos leinan fiskal ta brinda. Un ehèmpel ta e kampaña ku SBAB a kore algun aña pasá ku e asina yamá “kasregistratiesysteem”. Den e temporada aki por a mira ku mas i mas empresario a kuminsá kumpli ku nan debernan fiskal.
Tambe ta importante pa pueblo tin konosementu básiko di impuestonan ku nan mester paga i tambe algun konosementu di e motibu dikon e impuestonan aki ta importante i nesesario.

Por último pueblo di Kòrsou ta enfrentá bastante difikultat pa por drenta den kontakto ku nos servisio di impuesto. Pa e motibu aki lo bini un “help desk” alkansabel pa preguntanan ku komunidat di Kòrsou por tin. E intenshon di e asina yamá “help desk” aki ta, ku pa medio di un yamada, pueblo di Kòrsou por haña e yudansa nesesario pa ku nan impuestonan. E “help desk” na departamento di impuesto, lo tin personanan kapasitá ta traha ku por duna kontesta na preguntanan ku siudadanonan por tin. Lo rekapasitá e personanan ku ta traha den e “help desk”pa por duna e servisio integral aki.
E “help desk” aki lo ta aksesibel pa medio di e wèpsait di nos servisio di impuesto i lo brinda e posibilidat pa chat online. Lo aktualisá e “helpdesk” pa hasié mas aksesibel.
Enfoke riba klientenan

Gobièrnu lo promové enfoke riba kliente di tal forma ku e trahadónan di Inspekshon i Ontvanger lo ta mas atento i servisial pa ku klientenan. Por ehèmpel, lo ankra den lei e término di dos luna pa servisio di impuesto reakshoná riba kartanan di opheshon i petishon. Pa e motibu aki ta importante pa introdusí den forma standarisá e sistema di evaluashon i kompensashon.
Tambe lo pone hopi importansia riba kontinuashon di digitalisashon di Inspekshon i Ontvanger pa pueblo di Kòrsou.
Banda di e kòntròlnan ku ya SOAB ta hasiendo riba área di IT, gobièrnu di Kòrsou lo evaluá kua ta e akshonnan adishonal ku ta nesesario pa SOAB hasi, pa por garantisá ku gobièrnu su sistemanan di IT ta konfiabel, disponibel i konfidensial.

- Sinkronisashon di dato entre Inspekshon, Ontvanger i SBAB
Partidonan ta di akuerdo ku e datonan di Inspekshon, Ontvanger i SBAB mester ta sinkronisá pa por brinda servisio di un forma optimal. E sinkronisashon i digitalisashon di dato entre Inspekshon, Ontvanger i SBAB ya ta andando bou di guia di personal di SBAB. E asina yamá “legger” nan aktualmente ta ser digitalisá i mandá pa Inspekshon i Ontvanger.
E proyekto aki ta unu basta ekstenso komo ku ta bastante informashon mester digitalisá. SBAB tin un grupo di persona ku ta partisipando na e proyekto di sinkronisashon i digitalisashon di dato aki. Gobièrnu lo sigui ku e proyekto aki bou di guia di SBAB. Mester fortifiká e sistema di IT ku ta krea un “audittrail” pa asina por detektá akseso no outorisá na e datonan di pagadónan di impuesto na ofisina di impuesto.
Tambe ta importante pa Inspekshon, Ontvanger i SBAB tin akseso na sierto informashon di Kadaster, manera informashon tokante tereno i edifisio. E suministrashon di informashon aki lo mester pasa gratuitamente i den un tempu stipulá. Gobièrnu lo analisá e posibilidatnan pa imponé esaki pa medio di kambio di lei. Por ehèmpel, Aqualectra ta manda informashon pa Inspekshon, Ontvanger i SBAB gratuitamente. Ofisina di impuesto ta risibí informashon nan nesesario di Kranshi i Imigrashon periódikamente.
Por último, entrante 2021 SOAB lo kontrolá periódikamente (minimal dos bes pa aña) e sistema di “Interface” entre Inspekshon i Ontvanger pa loke ta trata “opgelegde aanslagen”. Na mesun instante lo haña informashon di e sumanan pa loke ta trata dedukshonnan ku Ontvanger ta duna, “oninbaar verklaarde aanslagen”, “afboekingen”, “verjaringen”, pagonan risibí, “aanslagen” ku no a hasi pago riba dje i e probabel entradanan di impuesto ku Ontvanger lo risibí den futuro.
- Inspekshon di Invoerrechten i Accijnzen

E polítika di duana lo ta primariamente dirigí na reforsá e maneho i e organisashon riba e tereno aki pa asina por evitá desviashon i eskivashon di impuesto den pais. Mester reforsá e kòntròl di nos frontera (Haf, DOK, Vrije Zone, Aeropuerto, etc) i huntu ku otro instansianan relevante manera Imigrashon i Warda Kosta. Den kuadro di refuerso di nos kòntròl riba frontera, gobièrnu tin e siguiente puntonan di akshon:

1. Redusí i te kaminda por eliminá trafikashon ilegal di hende, droga, arma i otro produktonan;
2. Tambe mester pone mas atenshon na mantenshon i ampliashon di kontakto riba tereno di duana nashonal i internashonal;
3. Yena e vakaturanan ku tin habri, kuminsando na yena e vakaturanan ku tin den e tim di maneho di Duana. Duana tin un « onderbezetting » struktural di 25%. Falta tambe di Inspektor;
4. Mester kaba di revisá e Landsbesluit Douane Curaçao;
5. Mester aprobá i implementá e leinan di Duana pa modernisashon di proseduranan di Duana (ALDA);
6. Mester traha riba un maneho general pa subi entrada di Duana dor di subi “compliance” di e kliente;
7. Finalmente ta importante pa sera tratadonan di “duana” pa asina paisnan di preferensia ofresé e tarifanan di akseso liber na merkado pa produktonan di importashon.

Seri 41 Leinan