Seri di fragmentonan Akuerdo Gobernashon MFK/PNP 2021-2025 (44)

Lokal

Den EXTRA su afan pa sigui informá komunidat i pa e aspekto di transparensia, entrante awe lo inisiá un un seri di artíkulo ku fragmentonan for di e Akuerdo di Gobernashon MFK/PNP pa e periodo di gobernashon 2021-2025. Aspektonan importante ku tin influensia riba desaroyo di tur tereno ku ta afektá di un forma òf otro henter e komunidat di Kòrsou. Un pueblo bon informá por opiná.

(Teksto saka for di Akuerdo di Gobernashon MFK/PNP)

Seri 44 Generashon di mas entrada

Entre otro di e siguiente forma gobièrnu lo bai subi fluho di entrada di fondo:

Pa korto tempu lo introdusí un asina yama “korekshon boluntario” (vrijwillige verbetering / inkeerregeling) nobo, spesífikamente pa personanan ku tin kapital den eksterior i na Kòrsou i no ta paga belasting riba dje. E “inkeerregeling” mester kai bou di e reglanan fiskal;
Komo konsekuensia di Covid-19 lo introdusí un deskuento pa personanan ku paga (un parti di) nan debe di impuesto den un pagá. E deskuento aki lo ta mará na kondishonnan ku mester kumpli kuné;
SBAB lo kontinuá ku nan proyekto titulá ‘Guia den i Atministrashon Impuesto Temporal’ (Guait), den kual nan ta guia empresarionan pa pone nan atministrashon na òrdu i tambe konsientisá nan riba nan diferente derechi i obligashonnan fiskal. E proyekto aki ta brinda guia na empresarionan nobo tambe;
Gobièrnu lo hasi esfuerso pa kobra fiansanan ku gobièrnu a hasi na diferente instansianan;
Tambe lo legalisá edifisionan ku a ser konstruí ilegalmente, di moda di por kobra “onroerendezaakbelasting” òf “èrfpagt canon” riba e balor di e edifisio òf terenonan aki;
Lo reklasifiká terenonan di hür ku gobièrnu a duna pa agrikultura komo tereno di èrfpagt den kaso ku a usa e terenonan aki pa traha bibienda òf otro edifisio. Di e moda aki gobièrnu lo por kobra “èrfpagt canon” i “onroerendezaakbelasting” riba e terenonan aki tambe( riba e parti konstruí);
Gobièrnu lo stimulá imigrashon di personanan ku kapital i/òf konosementu pa stimulá nos ekonomia. Konkretamente lo hasi esaki pa medio di kambionan di lei kaminda lo eliminá algun área shinishi i introdusí leinan ku por stimulá imigrashon pa Kòrsou;
Tambe lo introdusí tarifa di seguridat i protekshon serka “Uitvoeringsorganisatie Curaçaose Burgerluchtvaart Autoriteit” (UO CBA) (ojo kosten verhogend)
Lo kambia e lei tokante “leges”, di moda ku por ahustá e tarifanan i hasi esakinan mas aktual. Lo mester modernisá e sistema di “leges”;
Lo hasi uso di e rapòrt “Taskforce Marktordening en Financiering Zorgsector” (TMFZ) pa baha gastunan di remedi sin perhudiká e kalidat di remedi na Kòrsou;
Lo hasi mas kòntròl i kambio riba lisensianan di loteria i “kansspelen” pa asina generá mas entrada den kaha di gobièrnu;
Krea e fasilidat pa riferonan por habri kuenta bankario i por traspasá premio riba kuenta di e kliente i asina evitá ku klientenan ta kana ku suma di plaka kèsh huntu ku nan despues di a kobra nan premio serka e rifero òf tum’e den “eigen beheer” i ku ta ser finansiá dor di un gastu di atministrashon;
Deskribí proseduranan, prosesonan, instrukshonnan pa tur aktividatnan den gobièrnu ku ta generá entrada signifikante. Lo kontinuá ku e trabounan ku SOAB a bin ta hasi den kuadro di esaki;
Por último lo reforsá Ontvanger i duna Ontvanger e medionan nesesario pa por hasi e trabou mas optimal pa asina logra hasi e parti di kolekshon di impuesto mas intensivo. Gobièrnu ta konsiente ku aki tin hopi espasio pa mehorashon.