Den EXTRA su afan pa sigui informá komunidat i pa e aspekto di transparensia, entrante awe lo inisiá un un seri di artíkulo ku fragmentonan for di e Akuerdo di Gobernashon MFK/PNP pa e periodo di gobernashon 2021-2025. Aspektonan importante ku tin influensia riba desaroyo di tur tereno ku ta afektá di un forma òf otro henter e komunidat di Kòrsou. Un pueblo bon informá por opiná.

 (Teksto saka for di Akuerdo di Gobernashon MFK/PNP)

 Seri 45 Supervishon di Banko Sentral di Kòrsou i Sint Maarten

Gobièrnu lo fortifiká supervishon di Banko Sentral di Kòrsou i Sint Maarten riba institutonan finansiero ku ta operá lokal i internashonal. Den kuadro aki gobièrnu lo implementá e asina yamá “Landsbesluit depositogarantiestelsel”.

E “Landsbesluit depositogarantiestelsel” lo brinda un protekshon adishonal na e depósitonan bankario, i asina alabes duna Banko Sentral di Kòrsou i Sint Maarten un instrumento di supervishon pa konservá e kalidat di sistema finansiero lokal.

Tambe lo sigui ku proseso pa restablesé konfiansa den- i drecha imágen di Banko Sentral di Kòrsou i Sint Maarten tantu riba tereno lokal komo riba tereno internashonal.

Supervishon di “gaming”: na Kòrsou

Lo pèrkurá pa kompanianan ku ta brinda oportunidat pa partisipá den “online gaming” na Kòrsou tin un presensia real. Di e manera aki presensia di e sektor aki ta duna un “ boost” real na ekonomia di Kòrsou i generá mas entrada di impuesto den kaha di gobièrnu. Lo fortifiká e supervishon di “online gaming” pa asina kumpli ku norma internashonal. ( punto di atenshon: mester keda kompetitivo ku otro hurisdikshon manera Malta).

Plan di rekuperashon

Hopi di e investigashonnan inkluí den e asina yamá “plan di rekuperashon” ta investigashonnan ku nos propio hendenan huntu ku SOAB a hasi den pasado i ta basá solamente riba echo. No opstante esei, gobièrnu di Kòrsou, hasiendo entre otro uso di e konsepto “SMART”, lo bai evaluá kua di e proposishon nan lo ser implementá.

Entidat finansiero

Lo investigá e posibilidat pa entidat finansiero lokal por invertí nan sèn na Kòrsou risibiendo un interes mas haltu, esaki teniendo kuenta ku nan diversifikashon di riesgo i teniendo kuenta ku e kapasidat pa paga bek.

Kámara di presupuesto (“begrotingskamer”)

Den kuadro di karga responsabilidat finansiero propio, mester ankra den nos propio leinan un órgano pa supervishon finansiero; e asina yama Kámara di Presupuesto (“Begrotingskamer”). E kámara aki mester pèrmití pais mantené e situashon finansiero sano, saludabel i duradero. Esaki hasiendo uso di tur otro instrumentonan legal manera entre otro e lei riba disiplina di presupuesto. Den e kámara aki mester tin un repartishon di responsabilidat entre Algemene Rekenkamer i SOAB.

Presupuesto balansá

E maneho di presupuesto ta unu kaminda tur esfuerso ta keda hasi pa entrada i salida di gobièrnu pa lokual ta gastunan koriente (“gewone dienst”) keda den balanse òf ekilibrá (“sluitende begroting”). Teniendo na kuenta nos realidat sosial i finansiero ekonómiko.

Maneho Finansiero (“Financieel Beheer”)

Lo reforsá disiplina di presupuesto;

Lo tene hende responsabel (“accountable”) pa violashon di reglanan i leinan di kontabilidat di Pais ku por a okashoná daño na Kòrsou.

Sektor finansiero internashonal

Hopi kambio a tuma lugá den e sektor finansiero internashonal, prinsipalmente riba tereno di “off-shore”. Ku bista riba futuro gobièrnu mester tin kontakto intensivo ku e grupo aki (CIFA) pa komprondé nan nesesidatnan i kaminda ta posibel tradusí esaki den sosten na e sektor i desaroyo di produktonan nobo den kuadro e realidat nobo ku ta mas “on-shore” kaminda “compliance”,“transparency” i “substance” ta di sumo importansia.

Financial Investigation Unit of Curaçao FIU

Mester pone atenshon na “Financial Investigation Unit of Curaçao” (FIU) pa kombatí labamentu di plaka.

Posibilidat pa fondo adishonal

Ministerio di Finansa lo ta habrí pa por kontribuí pa krea posibilidat pa fondo adishonal pa finansiá un plan di rekuperashon (“herstelplan”) pa Kòrsou. Sektor privá tambe lo por partisipá (public private project). Lo wak ku por duna insentivo fiskal p.e. pa finansiá proyekto ekonómiko.

Seri 46 Bentaha kambio impuesto riba benta (OB)