Den EXTRA su afan pa sigui informá komunidat i pa e aspekto di transparensia, entrante awe lo inisiá un un seri di artíkulo ku fragmentonan for di e Akuerdo di Gobernashon MFK/PNP pa e periodo di gobernashon 2021-2025. Aspektonan importante ku tin influensia riba desaroyo di tur tereno ku ta afektá di un forma òf otro henter e komunidat di Kòrsou. Un pueblo bon informá por opiná.
(Teksto saka for di Akuerdo di Gobernashon MFK/PNP)
Seri 48 Organisashon di Maneho di Ministerio di BPD ( Beleidsorganisatie)
Organisashon di Maneho ta enkargá ku desaroyo di aparato pa e gobièrnu en general ku ta responsabel pa desaroyo di e organisashon.
Áreanan di enfoke:
Optimalisá e aparato gubermental dor di:
Bin ku un “nulmeting/audit” den e Ministerio di BPD mes I tambe eventual fundashonnan i/o NV’s nan ku ta kai bou di Ministerio di BPD
Implementashon di “E-Goverment” ku e meta pa optimalisá e funshonamentu di e aparato gubermental i tambe optimalisá kontakto i servisio pa ku e pueblo via medionan digital. Asina tambe lo krea “Smart Government”. Den e kuadro aki nos lo pone e atenshon nesesario na implementashon di “E-Government/E-Governance” i un gobièrnu habrí di manera ku pueblo, organisashonnan partikular i otro instansianan di gobièrnu fásilmente por hasi uso di servisionan ku gobièrnu ta ofresé́ i/o informashon ku gobièrnu ta disponé di dje. Esaki lo ker men ku lo purba pa trèk dor “E- Government” tambe na e komunidat . Esaki teniendo kuenta ku lei di privasidat (Landsverordening Bescherming Persoonsgegevens voor Curaçao en Sint Maarten ) i otro leinan nesesario pa garantisá ku mal uso di informashon ta wòrdu ekskluí. Nos lo bini ku un trayekto di digitalisashon i outomatisashon dinámiko; I tambe ku un trayekto pa ofresé mas tantu produkto posibel di gobièrnu via internèt; Un maneho efikas i duradero mester ta parti integral di un maneho di desaroyo duradero pa Kòrsou. Esaki ta duna posibilidat pa sinkronisashon planifiká́ ku desaroyonan riba otro áreanan di maneho, manera enseñansa, naturalesa i medio ambiente, hustisia (imigrashon) i finansa.
Suavisá e implementashon di e asina yama “ stelsel van Basisregistraties” di manera ku tur e basisregisternan den e aparato gubernamental ta wòrdu konektá ku otro. Esaki lo kontribuí na un aparato mas efisiente.
Duna mas realse na nos demokrasia dor di enkaminá e kaminda pa trese Adaptashon di “Kiesreglement Curacao” E kambio lo enserá ku lo por skohe un promé minister ku votonan popular direkto i skohe parlamentario ku voto popular direkto. Lo tin tambe un referèndùm pa pueblo ekspresá́ su mes riba temanan konstitushonal ku lo mehorá nos demokrasia. Ku esaki nos ke logra stabilidat polítiko pa nos tin e garantia ku e akshonnan implementá́ pa un gobièrnu, no por kambia repentinamente ku kada kambio di gobièrnu.
Adaptashon di “Landsverordening Ambtelijk Bestuurlijke Organisatie”, basá riba un update di e investigashon i rekomendashonnan ku SOAB | ARC a hasi. Pa entre otro wak e posibilidat kon lo por logra instituí un “bestuursdienst” hasiendo posibel pa SG,SD I BD por wòrdu ubiká den e “bestuursdienst” aki i for di e “bestuursdienst” nan por kambia kada 5 aña entre e diferente ministerionan. Tambe e “bestuursdienst” aki lo por wòrdu uzá pa ubiká personanan ku por traha riba un proyekto den un Ministerio i sigui bai traha pa otro Ministerio pa otro proyekto.
Konstrukshon na un lugá stratégiko di un edifisio ku lo akapará tur e ministerionan fasilitadó di gobièrnu (p.e. BPD, FIN I WJZ). Asina lo logra baha gastu, di hür i realisá gobernashon efektivo i efisiente dor di atendé e problemátika ubikando e aparatonan gubernamental fasilitadó den un solo edifisio.
Lanta un unidat independiente (integriteitskamer), ku outorisashon pa promové i investigá delitunan di Korupshon, i fortifiká nos gobièrnu den prosesonan pa evitá korupshon .E “integriteitskamer” mester por atendé ku kehonan kontra bestuurders i ámtenarnan den tur ministerio. Mester introdusí un “klokkenluidersregeling” tambe pa protehá e ámtenarnan ku ke hasi un denunsia pa ku korupshon òf faltamentu ku integridat na trabou. Esaki ta pa realisá un komportashon korekto i íntegro di e ámtenar dor di pone reglanan ku ámtenar mester kumpli kuné den su funshon i tene kontrol riba esakinan.
Lo sigui ku e maneho di Integridat di mandatarionan i parlamentarionan kual ta di gran importansia, no solamente pa loke ta konfiansa di siudadanonan, pero tambe pa invershonistanan i en general pa bon funshonamentu di nos estado di derechi.
Pa halsa nivel di integridat e gobièrnu aki lo bai tuma tambe e siguiente pasonan:
Implementá “screening” riba integridat di empleadonan públiko den funshon haltu i esnan na kabes di instansianan importante manera, Kontraloria General, etc., fundashonnan i kompanianan di gobièrnu. Pa esaki e lei aktual di “screening” lo sirbi komo punto di salida.
Revisá e lei di “Screening” konforme e input di “Raad voor de RechtsHandhaving” kaminda nan a bisa bon kla ku e prinsipio ku bo ta inosente te ora un hues kondená bo, mester konta. I tambe ku Areglo di Estado art 30 no ta duna espasio pa bo bai regla nada den otro lei pa loke ta trata ora mester bira minister.
Mester fortifiká “compliance procedures” ku mester kontrolá si hendenan ta tene nan mes na reglanan di outorisashon, “checks & balances” den proseduranan etc. den tur ministerio. Esaki mester konta pa bestuurders i ámtenarnan . Lo reforsá “handhavingsprocedures” riba proseduranan por ehèmpel ouditorionan riba prosesonan riba base anual. Tambe lo hasi “risk audits” riba prosesonan ku ta “high risk” pa korupshon den tur organisashon di gobièrnu i bini ku maneho spesífiko pa e organisashon respektivo.
Laga hasi un estudio di e nesesidat i faktibilidat pa introdusí na Kòrsou un “Centraal Plan Buro”
Hasi Gobièrnu mas transparente i partisipativo dor di trata pa tur luna bai den bario, tene un “town hall meeting” òf di kualke otro forma krea e posibilidatnan pa siudadanonan pa por partisipá den ehekushon di maneho i laga nan wak kiko a wòrdu hasí ku nan remarkenan
Sigui ku e trayekto pa “Masterplanning”. E meta di “masterplanning” ta pa determiná kua ta e metanan riba término largu i pone e metanan aki den konkordansia ku otro. Awor aki ta traha maneho riba un tereno sin tene kuenta ku konsekuensianan riba otro tereno i no ta buska sufisiente data pa sostené e metanan aki i hasi e maneho mas dirigí riba e meta deseá.
Sigui konsentrá riba e metanan di e Agenda2030 i e “Sustainable Development Goals” (SDG’s) ku ta pertenesé na dje. Den e “National Development Plan Curaçao” (NDPC) esakinan a wòrdu hasi i a wòrdu mas sistemátikamente spesifiká den e ‘Roadmap for SDG implementation’ di 2018. Aki a determiná ku Kòrsou ta enfoká riba 6 siguiente SDG’s: 1. no poverty, 3. good health and wellbeing, 4. quality education, 7. affordable and clean energy, 8. decent work and economic growth, 14. life below water.
Seri 49 Organisashon di Maneho enkargá ku Maneho di personal i desaroyo di e personal (HR&O)
Laga un komentario