Den EXTRA su afan pa sigui informá komunidat i pa e aspekto di transparensia, entrante awe lo inisiá un un seri di artíkulo ku fragmentonan for di e Akuerdo di Gobernashon MFK/PNP pa e periodo di gobernashon 2021-2025. Aspektonan importante ku tin influensia riba desaroyo di tur tereno ku ta afektá di un forma òf otro henter e komunidat di Kòrsou. Un pueblo bon informá por opiná.
(Teksto saka for di Akuerdo di Gobernashon MFK/PNP)
Seri 50 Organisashon di Servisio Kompartí (SSO)
Departamento pa Servisionan Kompartí ta posishoná 6 fasilidat ku ta na disposishon di i ku ta sostené e nuebe (9) Ministerionan di Gobièrnu di Kòrsou. Ta trata di e siguiente fasilidatnan: Atministrashon Finansiero, Atministrashon di Personal, Maneho di Dokumento,· Kompra sentralisá,· Asuntunan di Fasilidat i Teknologia di Informashon i Komunikashon. Lo hisa kalidat di e servisionan ku “Shared Services Organisatie” tin ku brinda na e otro ministerionan
Areanan di enfoke:
Enfoká riba Kompra sentralisá via di SSO. Pa esei lo mester fortifiká e departamento aki i laga nan hasi kompra di produktonan ku tur ministerio ta usa di un manera sentralisá. Por ehèmpel “ICT devices”, “software”, papel, aparatonan pa kopia,mobilario, produktonan di higiena, kosnan di skirbi manera pèn, pòtlot etc. Lo por spar hopi sèn si hasi kompra na bulto enbes di kada ministerio hasi esaki riba su mes. E preis pa produkto por baha dor ku bo ta negoshá un kantidat grandi. Meskos ta konta tambe pa ora ta bai destaho públiko pa servisionan ku gobièrnu mester kumpra afó manera internèt, servisio di telefòn, vigilansia, limpiesa, etc
Evaluá e tareanan prinsipal i prosesonan ku ta pertenesé na S.S.O. pa e por ehekutá su servisionan mas efisiente i efektivo
Pèrkurá pa E ròl di fasilitadó keda serka SSO
Analisá kosto i benefisio pa trese klaridat den gastunan di gobièrnu
IV PUBLIEKE ZAKEN/VERGUNNINGENLOKET
Departamento di Asuntu Públiko ta registrá susesonan di bida (nasementu, fayesimentu, matrimonio, divorsio, rekonosimentu) den registronan sivil i for di e registronan sivil- i e atministrashon básiko di dato personal nan por suministrá kopia, ekstrakto i deklarashon. Banda di esei Departamento di Asuntu Públiko ta e departamento enkargá ku suministrashon di pasport, sédula i reibeweis na Kòrsou.
(Publieke Dienstverlening waaronder het bevolkingsregister, afgifte rijbewijzen, identiteitsbewijzen en vergunningenloket.)
Areanan di enfoke:
Mehora e aksesibilidat na servisio públiko ku ayudo di ICT i evaluá aksesibilidat i kontinuidat. Esaki pa optimalisá e servisio di kliente (klantvriendelijkheid,klantgerichtheid & klanttevredenheid), tantu na nivel interno komo eksterno
Garantisá tur hende tin derechi di akseso na informashon i servisio, inkluso esnan ku tin un òf otro limitashon
Tene kuenta ku e eksperensia di kliente pa ku e servisionan duna dor di gobièrnu ku e meta pa sigui mehora i optimalisá esaki.
Pa esaki nos ta krea i implementá norma di maneho i instrumentonan pa monitoriá, pa midi regularmente e kalidat i nivel di servisio públiko i ehekutá investigashonnan ku ta midi satisfakshon di e kliente (klanttevredenheidsmetingen) tambe.
V CENTRAAL BURO VOOR DE STATISTIEK (CBS)
Ofisina Sentral di Statistik Kòrsou ta e instansia ofisial i outorisá. ku ta kolektá, analisá i publiká informashon relevante riba e terenonan demográfiko, sosial i ekonómiko di Kòrsou (Publiceren van betrouwbare statistische gegevens en het objectief vaststellen van een aantal parameters voor gebruik in planningen en prognoses;)
Area di enfoke
Sigui ku e trayekto di independisashon CBS; un órgano independiente pa yuda ku inisiativanan di maneho, tambe pa lokual ta trata finansa I personal pero dunando kuenta I rason na Gobièrnu pa su maneho di personal I su finansa.
Bini ku un “update” di estudio pa sigui desaroyá empleado na CBS dor di introdusí entre otro edukashon permanente i tambe “peer reviews” pa tene e empleado skèrpi konforme palabrashonnan ku lo hasí ku Gobièrnu.
Garantisá ku senso 2022 lo por sigui, dentro di e kuadronan presupuestario
VI CENTRAAL HISTORISCH ARCHIEF (Archivo Sentral Históriko)
Di akuerdo ku e “archieflandsverordening” e tarea di Centraal Historisch Archief ta pa tin un tarea importante denter di e provishon públiko di informashon dor di ta e stashon final den e siklo di archivonan di gobièrnu. Ta p’esei ta importante pa modernisá, drechá i optimalisá e lugá sentral pa warda dokumentonan históriko i di archivo dinámiko (dynamisch archief).
Area di enfoke:
Redusí gastu di warda/depositá dokumento dor di saneá e archivo dinámiko di e ministerionan
Implementá “e-depot” na Archivo Nashonal ku su kursonan online pa e trahadónan garantisá e akseso pa yega na tur archivo di siudadano I nan desendiente legal
VII COLLEGE BESCHERMING PERSOONSGEGEVENS
Di akuerdo ku “Landsverordening bescherming persoonsgegevens en College Bescherming Persoonsgegevens” mester garantisá e privasidat di e datonan personal di e siudadano, ku dor di introdukshon di “E-government”, stèlsel di registrashon básiko i digitalisashon lo por ta na peliger.
E “College bescherming persoonsgegevens” tin e tarea pa garantisá ku e prosesamentu di datonan personal di e siudadano ta sosodé di e manera stipulá legalmente. Tambe e mester supervisá si e prosesamentu di datonan personal denter di Reino ta sosodé konforme leinan di otro pais den Reino Hulandes.
Area di enfoke:
Finalisá implementashon di “College Bescherming Persoonsgegevens”
Reklutá e persona kualifiká pa hasi esaki posibel.
Seri 51 MINISTERIO DI HUSTISIA (JUS)
Laga un komentario