Den EXTRA su afan pa sigui informá komunidat i pa e aspekto di transparensia, entrante awe lo inisiá un un seri di artíkulo ku fragmentonan for di e Akuerdo di Gobernashon MFK/PNP pa e periodo di gobernashon 2021-2025. Aspektonan importante ku tin influensia riba desaroyo di tur tereno ku ta afektá di un forma òf otro henter e komunidat di Kòrsou. Un pueblo bon informá por opiná.
(Teksto saka for di Akuerdo di Gobernashon MFK/PNP)
Seri 58 Prevenshon
Salubridat
E krísis di e Pandemia di COVID-19 a inisiá na Kòrsou ora e promé infekshon a bira konosí na Kòrsou, riba 13 di mart 2020. COVID-19 a trese impaktonan grandi finansiero, ekonómiko, sosial, pero mas ku tur kos e Pandemia ta poniendo un preshon enorme riba e sistema di salubridat. Un normal nobo a ser introdusí kual lo nifiká ku esaki lo keda reflehá tambe den kon servisio na pueblo lo ser ofresé.
E reto aki ta trese un oportunidat pa evaluá sí di bèrdat pueblo ta ser sirbí di e manera mas efektivo. E meta ta pa optimalisá e servisio na benefisio di pueblo.
Bini ku inisiativa i prosedernan nobo pa por ‘deal’ ku e Pandemia, sin kousa turbulensia serka e pueblo, pero mas bien dunando nan mas konfiansa i kitando miedu i rabia riba e situashon aktual
Nos salubridat mester ta dirigí riba e nesesidatnan spesífiko di nos pueblo, pa asina kuido i servisio bira mas aksesibel, kaminda hende ta yega sin ningun problema.
E servisionan lo wòrdu duná na un manera integral. Esaki ta nifiká ku lo bini un koperashon estrikto entre dòkternan, kaminda e pashènt ta para sentral. Pues e hende ta wòrdu mira den su totalidat pa asina por hasi un eskoho for di tur e tipo di tratamentu ku ta disponibel.
Pa hasi e servisio di salubridat mas aksesibel, lo bai kordiná, amplia i optimalisá. Huntu ku esaki mester bini programa nan di informashon amplio.
Pa medio di programa nan online/youtube krese e sentido di amor propio, norma i balor bèk na e pueblo. Pueblo lo eksperensiá salubridat di bon kalidat serka di kas.
Pueblo di Kòrsou pa basta aña kaba ta bringando kontra efektonan dañino di malesanan króniko, e asina yamá “Non Communicable Diseases” bou di kual ta kai malesa di suku, malesa kardiovaskular (preshon haltu, atake selebral, atake di kurason), kanser, malesa respiratorio króniko i malesa mental.
Pueblo lo ta mihó sirbi ora ku optimalisá e struktura di servisio i usa medio moderno di komunikashon entre e diferente ekspertonan ku ta traha riba tereno di malesa króniko.
Lo por minimalisá réplika di servisio i tambe baha gastunan di remedi ora profeshonalnan den kuido por traha na un manera harmonisá i konforme protokòl.
Standarisá idioma di komunikashon entre profeshonalnan médiko.
Ta apto pa komuniká ku e kliente den su mes idioma ta un kondishon esensial i nesesario pa alsa kalidat di kuido.
Ta ampliamente konosí ku gastunan di remedi ta hopi haltu i ta pisa riba e presupuesto di salubridat. Gobièrnu lo kier realisá un balansa finansiero riba aria di remedi i lo eksplorá oportunidat i alternativanan.
Lo hasi un sondeo pa analisá posibilidat pa kumpra remedi en koperashon ku otro paisnan den reino Hulandes i/òf den koperashon ku institutonan di salú regional i internashonal basá riba un volúmen mas grandi, bou di kondishon ku e kalidat di remedi genériko ta igual ku e kalidat di remedi specialité.
Lo optimalisá kontròl riba remedi pa evitá ‘counterfeit’ i tambe ta garantisá ku tin un balansa finansiero realístiko entre kompra i benta di remedi.
Tantu fondo di seguro básiko komo fondo di lei di labizjan no ta pasando den nan mihó tempu. Gobièrnu kier salbaguardiá servisio di salubridat di kalidat ku ta pagabel pa pueblo di Kòrsou. Un análisis profundo i detayá lo por duna direkshon pa yega na un solushon.
Lo sondia posibilidat di koperashon riba tereno di aseguro médiko entre paisnan di Reino Hulandes i otro paisnan den nos region i internashonal.
Desaroyo mundial ta boga pa paisnan traha mas den koperashon ku otro di un forma organisá pa logra bienestar di nan mes pueblo i di mundu en general. Den e kuadro aki Gobièrnu lo buska koperashon den region i internashonal ku institutonan i instansianan riba tereno di salubridat, pero tambe medio ambiente, naturalesa, agrikultura, krio di bestia i peska.
Seri 59 Medio ambiente i Naturalesa
Laga un komentario