WILLEMSTAD.- Fundashon Reskate di Kultura resientemente a entregá sertifikado na un grupo di hóben ku a partisipá na tayer di Sla’i Tambú ku a tuma lugá na Museo di Tambú Shon Cola. E tayer tabata spesial pa hóbennan di bario parti pariba di Kòrsou. Meta di e tayer tabata:

Trese mas konosementu i konsiensia riba tambú di Kòrsou;

Lanta interes pa historia, organología, baile, músika i kanto di tambú;

Stimulá hóbennan pa partisipá mas konsiente na tambú komo un herensia kultural importante di Kòrsou;

Krea un fundeshi sólido pa e petishon ku den futuro serkano lo bai UNESCO pa deklará tambú di Kòrsou un patrimonio di humanidat;

Durante 5 siman e hóbennan a haña tayer riba:

Historia di tambú ku un rekorido den Museo di Tambú Shon Cola serka Indira Boelbaai i dr. René Rosalia.

Reglanan di étika i diferente forma di balia di tambú serka Indira Boelbaai.

Formanan di manifestashon di tambú na kas, riba kaya i entre barionan serka dr. René Rosalia.

Trahamentu di tambú, material i forma di fabrikashon tradishonal serka Ruben Rosalia.

Tayer di toka tambú i chapi serka Rendel Rosalia.

Diferente forma di kanto i kantika di tambú serka Ludsella Tela Sambo i Ella Bernabela .
E hóbennan tabatin hopi interes pa partisipá na e tayernan i na e momentunan práktiko nan tabata reta otro pa wak kua grupo ta presentá mas mihó. Un danki spesial ta bai na Majron Maduro lider di “Fundashon Un bon hóben pa un bon famia” i Fabian Martina lider di “Grupo Tekla” ku a stimulá nan hóbennan pa partisipá. Fundashon Reskate di kultura ta deseá henter pueblo di Kòrsou un felis Pasku i un próspero aña 2022.

Fundashon Reskate di Kultura ta gradisí Prins Bernhard Cultuurfonds Caribisch Gebied i Ministerio di Kultura pa e sosten finansiero.