WILLEMSTAD.- Servisio di Atmishon i Pèrmit (Imigrashon) lo ta sera awe pa asina por hiba kombersashon ku e personal, ya ku despues di detenshon dje hefe kosnan no ta kanando manera debe ser. E personal ta sinti e nesesidat di papia. Esei EXTRA por a komprondé for di deklarashon di Minister di Hustisia, mr. Quincy Girigorie. Manera ta konosí, algun siman pasá e direktor E.C. a keda detené i tambe a prolongá su detenshon. E detenshon di E.C. a sòru pa basta reakshon den komunidat.

Segun e minister, muchu mas di e kaso riba su mes e lo no por bisa komo ku e kaso ta den man di Ministerio Públiko. Pero komo mandatario enkargá ku e servisio ku ta kai bou di su ministerio, e tabatin kombersashon ku e entidat aki, i a base di e kombersashon ku el a sostené ku nan a yega na e konklushon ku lo tene e servisio será pa gran parti di  dia djawe.

Segun sr. Girigorie, e situashon ku ta reina denter dje organisashon ta di tal índole ku e personal ta sinti ku nan tin hopi preshon riba nan, i komo tal nan tin e nesesidat pa papia ku profeshonalnan pa sa kon nan tin di atendé ku e situashon, pues e tenshon ku ta eksistí, e preshon di trabou, e parti emoshonal etc. E ta komprendibel ya ku despues di e detenshonnan, a surgi tenshon, nan tambe tin preokupashon.

Esei a pone ku direkshon di e Servisio di Atmishon i Pèrmit a opta pa pidi un profeshonal di e tereno aki bin pa asistí e personal. Durante dia esnan ku ta sinti e nesesidat lo haña e oportunidat di papia i ekspresá nan mes i asina yuda nan maneho i atendé ku e tenshon di un forma mas korekto i responsabel.

Despues di e seshon di terapia aki nan lo sigui duna servisio na komunidat.

“NUL METING”

Pa loke ta e proseso di “nul meting” ku a keda pendiente, esaki ta algu ku e minister a papia tambe ku e trahadónan. E ta kere ku pa otro siman un desishon lo por a kai kaba pa sa ken ta bai hasi e “nul meting” aki, e kuadronan tambe, pa asina riba término korto por start. Pero for di e presentashonnan ku el a haña i den kombersashon ku direkshon di e servisio ya tin un idea riba kua aspektonan mester tin evaluashon pa evitá ku sierto kosnan por tuma lugá den futuro i pa e personal tin un konfiansa pa nan por sigui funshoná den dje.