Ambulans, Selikor, polis tin mester di bateria, tire i otro piesanan

WILLEMSTAD.- Komersio tin tur komprenshon ku Kòrsou meskos ku hinter mundu ta den un pandemia di Covid i mester pèrkurá pa tene distansia, laba man i tur e otro medidanan di higiena ku ta nesesario. E departamentonan konserní di gobièrnu a indiká kua ta e funshonnan vital ku ta haña eksonerashon pa sigui funshoná apesar di medidanan estrikto. Djis pa menshoná algun, e enfermera, e médiko, Selikor, polis, ambulans i algun mas ta vital i komo tal mester sigui traha. Tur tin un òf mas vehíkulo pa nan por yega nan destino i pa kumpli ku e servisio vital. Si e outo di polis, e ambulans, e trùk di Selikor tin mester di tire, bateria òf kualke otro piesa e mester por haña e piesanan i mekániko pa hasi e reparashon i asina por sigui ku e trabou i funshon vital.

E kompania NAPA ta bende diferente piesa pa mayoria tipo di vehíkulo, i tambe ta konosí pa benta di tire i bateria. Sinembargo NAPA no por habri pasobra e servisionan a indiká ku e kompania aki no ta vital. E dianan aki NAPA ta haña yamada di polis, ambulans, Selikor, e garashi unda ta drecha tur ambulans i vários otro empresa òf servisio vital ku ta sklama pa yudansa. Nan tin mester di bateria, tire i otro piesa urgente, pero NAPA no por habri asina Stephen Maduro gerente di NAPA a duna di konosé na EXTRA.

Maduro a splika ku énfasis ku nan ta konsiente ku mundu ta pasando den un pandemia. Den pasado nan tabata riba e lista vital debí ku nan ta sirbi e servisionan i funshonnan vital manera ariba menshoná. Nan ta den kombersashon ku Ministerio di MEO pa trata na yega na un areglo, pero mientrastantu tur dia tin servisionan vital ku ta pidi yudansa i NAPA no por ni maske kon serio e kaso ta. Un ehèmpel kritiko ta na momentu ku e kompania ku ta service ambulansnan yama buskando un piesa i NAPA mester indiká ku nan tin e piesa pero no mag habri ni pa ambulans haña e piesa enkuestion.
E situashon ta difísil pa tur esnan konserní, asina maduro ta sigui bisa pero e  ta spera ku pronto partidonan lo por haña otro i yega na solushon pa e dilema aki.

Te siman pasa NAPA tabata duna servisio curb-side, loke ta enserá ku tur hende ta keda den nan outo i haña e servisio nesesario. Esei no ta posibel mas segun e outoridatnan. Maduro a konta di un médiko ku su bateria a baha i  a logra jumpstart e vehíkulo, sperando ku e por pasa NAPA kambia e bateria pa sigui bai hospital. Pero esaki no por mas, i na su lugá a bini proposishonnan simpátiko pero ku no ta funshoná den práktika.

Maduro ta mustra ku e preshon di servisionan i hendenan ku funshon vital ta oumentá, ya ku nan mester por hasi uso di vehíkulonan pa duna kuido, sinembargo NAPA no por falta ku regla. P’esei ta spera ku esnan konserní lo por yuda pa yega na solushonnan realístiko i práktiko.