Na e momentunan aki tin dos disturbio moviendo wèst riba oséano Atlántiko sentral i ta situá entre islanan di Kabo Verde i di Karibe. Aktualmente e sistemanan tropikal aki no ta forma un menasa direkto pa Kòrsou. No opstante disturbionan moviendo riba oséano Atlántiko ta forma menasa pa Kòrsou, Servisio Meteorológiko Kòrsou ta vigilá e desaroyo di e disturbio nan aki.

E tempu ku tin ta por lo general parsialmente nublá i no ta antisipá áwaseru signifikante.

Temperatura máksimo lo alkansá 33 ºC, i temperatura mínimo di 27 ºC.

Bientu lo supla  Generalmente ost i moderá; forsa 3 pa 4 (12 pa 30 km/ora, 7 pa 16 nudo). Ráfaga de bes en kuando basta fuerte; forsa 5 (31 pa 39 km/ora, 17 pa 21 nudo).

Situashon general: Durante e próksimo oranan nubianan haltu den atmósfera lo sigui move riba nos region. Mas aleu, durante di djasabra mardugá i mainta, ta spera un oumentá di nubianan na nivelnan mas abou den atmósfera ku eventual por kondusí na un òf mas áwaseru di durashon kòrtiku riba nos isla i bisindario. Tambe fluho di bientu lo sigui moderá den nos área durante di wikènt benidero.

Kondishon di laman: Trankil te moderá ku altura di olanan entre 0.5 pa 1.5 meter (2 pa 5 pia).

Sistemanan signifikante di wer tropikal: Depreshon tropikal number nuebe ta sigui desaroyá i gana forsa serka di e islanan di Bahamas. Pronóstiko ta indiká, ku e sistema tropikal aki tin posibilidat pa desaroyá den un tormenta tropikal den e próksimo 24 ora.

Perspektiva te djadumingu atardi: Parsialmente nublá i generalmente seku.

Pronóstiko di tempu pa Kòrsou i bisindario bálido te djasabra atardi 6 or.