WILLEMSTAD:- Carrefour Market ta pendiente pa habri su portanan den luna di mart próksimo na Sambil. E fecha, ta un sorpresa ainda. Maneho di e supermerkado ta preparando riba diferente nivel pa e apertura. Asina por menshoná ku próksimamente lo tene un seshon informativo pa tur kunukero i piskadó ku ta interesá pa traha ku Carrefour Market.

Den tur merkado na unda Carrefour Market ta operá nan ta traha ku kunukeronan lokal, p’asina ofresé produktonan lokal fresku (bèrdura, fruta i piská) na klientenan. Kòrsou no ta un eksepshon. E seshon informativo ta un oportunidat ideal na unda e kunukero i piskadó por duna informashon di nan preis i skema di entrega di produkto. Durante di e seshon aki por tuma nota tambe di tur loke Carrefour Market tin mester i di e stándart di trabou i kalidat di produkto ku Carrefour Market ta fèrwagt. Tambe, lo duna tur hende oportunidat pa hasi pregunta na maneho di e supermerkado tokante entrega i pago di produkto.  Kunukero i piskadónan interesá mester registrá via marketing@crfrcuracao.com òf  WhatsApp 690.6901 pa e seshon informativo ku lo tuma lugar otro siman djarason dia 13 di febrüari for di 10’or pa 11’or di mainta. Unabes ku registrá, lo risibí tur sobrá detaye. Pa mas informashon por bishitá e página di Facebook di Carrefour Curacao.