Jacinto Zimmerman ta splika

WILLEMSTAD.- Na Ulanda, Eindhoven tabatin apertura di e fiesta di kosecha, Seú. E ta keda organisá pa Stichting Gedeeld Verleden Gezamelijke Toekomst Eindhoven. Jacinto Zimmerman, presidente di e fundashon GVGT Eindhoven, den deklarashon na EXTRA Ulanda a konta kon nan a lanta i e fiesta grandi dia 25 di mei awor.

El a bisa ku komo nan ta leu for di kas, e fundashon ta boga pa konservá, promové i duna atenshon na nos kultura i seú ta un parti importante, ku a siña for di chikí ku por partisipá i eksperensiá. Seú ta trese unidat tambe i esei e ku tin 40 aña biba na Ulanda, e ta envolví den hopi organisashon i el a ripará ku nos komunidat antiano, mester haña nan lugá na Ulanda. Nan tur ta pertenesé na e kolonia ulandes i esei mester ta algu bon kla.

Teniendo na kuenta ku na Ulanda tabatin e tendensia ku tur hende ta selebrá Ketikoti, nan di e fundashon ta pensa ku tur e islanan di èks antia tambe tin nan tradishon i p’esei nan a logra riba forsa propio pa trese algun aktividat di nos kultura aña pasá, ku un konsierto entre otro ku Tamara Nivillac, tambe un dia habrí pa hendenan siña bailenan di nos kultura i despues a pone un dia di emansipashon Dutch Caribbean.

Aña pasá ku tabata 150 aña di liberashon sklabitut, sigur mester duna rèspèt pa e surinameñonan ku a bin ku nan tradishon, pero nos antianonan no a keda pará ketu. Rònt Ulanda tin boluntarionan trahando pero Zimmerman kier a wak e kos mas profundo, respetando loke otro tin, pero no por kai bou di mesun nòmber. I p’esei a lanta e fundashon akí, pa trese aktividatnan abase di nos kultura karibense ulandes.

Dimes nan a haña protesta pero nan direktiva a lucha i mustra loke nan tin aden. Aña pasá tabata un lucha i e aña akí a realisá ku nan tambe t’ei. P’esei e aña akí nan ta organisá un dia di seú, pa duna e komunidat na ulandes e nifikashon di seú. A kombin’é ku programa di kanto ku diferente grupo i tambe Vanny Hooi ku ta duna algun splikashon.

Esun di wikènt pasá ta djis un apertura, pasobra dia 25 di mei lo tin e evento grandi den Eindhoven, pa realisá ku nan t’ei. Lo tin seú den sentro di siudat i kab’é riba Stadhuisplein, ku e kultura di e islanan i asina mustra e unidat. I e loke ta mas importante  segun sr. Zimmerman, ta ku dor di e komunikashon di nort i zùit nan a uni, paisanonan di nort a presentá den e programa pa asina demostrá ku ta un famia nan ta.

Nan a haña e refuerso di e otro siudatnan ya ku Eindhoven ta mas ketu riba e tereno ei. I dia 25 di mei lo invitá tur grupo di seú rònt Ulanda i esei ta e komienso nobo, ku union ta hasi forsa. “Tiki tiki mester realisá ku leu for di kas nos ta keda ku e kultura den nos maleta”, asina Jacinto Zimmerman a bisa. E evento ta kuminsá for di 10 or di mainta na Eindhoven.