WILLEMSTAD.- E sindikato ku ta representá trahadónan di kontratista riba tereno di refineria i tambe Curaçao Oil Terminal (COT na Bullenbaai) SGTK ta den kontakto kontinuamente ku direktor interino di Refineria di Kòrsou(RdK) Marcelino ‘Chonky’ de Lannoy. E siman aki mes SGTK tin un reunion ku de Lannoy, asina Alcides Cova a deklará na EXTRA.

...Alcides Cova...

Siman pasá RdK a anunsiá ku ta bolbe hala e fecha riba kua partidonan interesá den e refineria por entrega un proposishon fiho (binding proposal). E fecha nobo ta 18 di desèmber 2020. E preokupashon bou di esnan ku ta traha direktamente òf via kontratista pa refineria ta oumentando mirando ku fin di aña ta yega sin un solushon.

No ta promé bia ku RdK ta buskando i negoshando pa haña un operador nobo pa e refineria. Tin algun okashon ku e proseso a kai den otro i kada bia mas tantu trahadó ta kedando sin trabou i komo tal sin entrada. Algun luna pasá a bira konosí ku tin un grupo ku a mustra interes ku ta konsistí entre otro di empresarionan i sindikatonan ku representashon den e refineria. A bira konosí tambe ku e grupo ei ta kla pa drenta i kuminsá invertí mesora den preparashon i mantenshon di e plantanan, loke ta nifiká un invershon di alrededor di 120 mion dòler.

Den kombersashon ku Alcides Cova el a duna di konosé ku nan a proponé na sr. De Lannoy pa e tim di PMO por negoshá ku e grupo òf gruponan ku firma e proposishon fiho pa no warda te mart/aprel 2021 pero pa kuminsá for di awor ku trabounan di mantenshon nesesario. Komo téknikonan, nan sa ku promé ku kuminsá ku operashon di e refineria tin hopi trabou di mantenshon ku mester tuma lugá. Si kuminsá buska trahadónan lokal pa kuminsá ku trabounan di mantenshon sikiera esei ta duna aliento i speransa atrobe.

SGTK ta hopi kla i serio den e asuntu aki, a bolbe posponé e fecha pa entrega un proposishon fiho pero pa dia 18 di desèmber mester tin klaridat. No por sigui Asin’aki ku fin di aña ta yega sin ku tin klaridat. SGTK ke mira algu konkreto mas tarda 18 desèmber 2020.