WILLEMSTAD.- Mester yega na un tipo di akuerdo riba salario mínimo ku ta paga trahadónan di kontratista. Tin trahadó eksperensiá na Kòrsou, pero nan no ta bai traha pa e salarionan ku ke paga.
Asina presidente di sindikato SGTK, Alcides Cova ta deklará. E ta referí na trabounan ku ta bai habri den e proyekto di revishon riba tereno di Refineria Isla.
Falta hende pa hasi e trabounan i Refineria di Kòrsou i kontratistanan ta dunando e trahadónan mal nòmber bisando ku nan no ke traha. E bèrdat sinembargo ta otro, Cova ta bisa.
Despues ku Refineria Isla BV a sera su portanan ta alrededor mil trahadó a pèrdè trabou. Un parti chikí di nan a bait traha den eksterior, pero mayoria ta sinta na kas i ta kue kualke otro djòp òf a haña trabou den un otro ramo.
Den nan tin trahadónan ku 20 aña òf mas di eksperensia trahando riba tereno di e refineria. Pues tin lasdó, “pipefitter” i “bankwerker” ku ta esnan ku mas ta pidí den e promé fase di trabounan di revishon, segun Cova.
E problema ta ku ke paga e trahadónan aki entre 12 pa 14 florin pa ora miéntras ku nan tin 20 aña eksperensia i a sigui kursonan. “Nan ta trahadónan kapasitá ku promé ku refineria a sera tabata gana 20 florin òf mas pa ora.”
Ta bin aserka ku ta ofresé nan un kontrato pa 4 òf 6 luna di trabou. “Nan no ta laga e djòp ku nan tin aworakí pa traha pa un kontrato di durashon kòrtiku anto pa kolmo pa tiki salario.”
Pa SGTK no ta aseptabel sinembargo ku Ministerio di Desaroyo Sosial, Labor i Bienestar (SOAW) ta duna pèrmit pa buska e tipo di trahadónan aki den eksterior. “Nos tabatin kontakto ku Randolph Gijsbertha di SOAW i a bis’é ku e kos ai nota bai asina.”
Un di e promé aspektonan ku SGTK a mustra riba dje ta ku SOAW mester hasi muchu mas tantu na informá ku trahadónan por registrá pa bin na remarke pa trabou riba tereno di refineria. Segun Cova e tabatin kontakto ku vários èks trahadó ku a indiká ku nan no tabata na haltura ku tin trabou a habri.
Otro reklamo ku e sindikato ta risibí ta ku trahadónan mester kue 2 pa 3 bùs promé ku nan por yega na e departamento loke ta kostoso i alabes nan ta kore riesgo di yega lat i no por inskribí mas. Tambe tin ku ta bisa ku nan a registrá nan mes den pasado kaba, pero tòg e ministerio ta indiká ku no tin nan informashon. “Ami no sa ta kiko ta pasando na SOAW.”
Ministerio di SOAW sinembargo a hasi un apelashon riba e sindikato pa yuda pa informá miembronan ku tin posibilidat pa trabou. Pa e motibu aki SGTK ta informá ku tur ku interesá por pasa di djaluna pa djaweps for di 9 or di mainta te 2 or di mèrdia na departamento di labor pa registrá nan mes.
Den esaki Cova ta bisa ku el a hasi un apelashon riba Refineria di Kòrsou pa hasi e informashon disponibel di e 3 mil personanan ku den pasado a inskribí pa un trabou na Curaçao Refinery Utilities (CRU). “Na promé instante no tabata dispuesto pa koperá bisando ku ta trata di informashon privá di hende, pero despues Refineria di Kòrsou (RdK) a komprondé i a bisa di lo koperá.
Finalmente Cova ta bisa ku el a trese e reklamo di salarionan den reunionnan di Diálogo Nashonal i e gremio komersial tambe ta di akuerdo ku mester paga e trahadónan lokual ku e trabou ku nan ta hasi ta bal riba merkado. “Pero aparentemente ta RdK i promé minister s no ta komprondé esaki.”
Cova: “Ora nos bai prensa i reklamá nan ta rabia, pero ta kiko nan ke pa nos hasi anto? Sinta ketu i krusa man? Tur hende tin derecho riba e pais aki anto esei no ke men ku no por papia ora no ta respetá trahadónan.”
Na opinion di Cova ta gobièrnu mes mester intervení i yega na un tipo di palabrashon riba e mínimo ku tin ku paga trahadónan pa trabounan riba tereno di Refineria Isla. E pago konforme kontrato kolektivo ku trahadónan di kontratista tabatin den pasado mester ta e guia den esaki, e lider sindikal ta sigui bisa.
Tambe e ta haña ku gobièrnu di RdK mester yega na palabrashon riba oferta mínimo ku kontratistanan mester inskribí pe ora tin destaho pa proyektonan riba tereno di refineria. “Kualke kos envolví e kompania Global Oil tambe den e deliberashonnan aki pasobra nos tin informashon ku e kompania ta dispuesto di paga mas ku lokual e kontratistanan ta inskribí pe, pero ta bai aparentemente pa ken ta bisando nan pa paga ménos.”
Foto:
…Alcides Cova…
