WILLEMSTAD.- Ayera e kondenado na bida largu Shairon Paulina (38) a presentá  den Hof dilanti 3 hues, despues ku el a hasi un petishon via di su abogado mr Blonk, pa revisá su  evaluashon di kastigu di bida largu mirando ku na desèmber binidero e ta hasi 20 aña será.

Shairon Paulina a keda kondená na un kastigu di bida largu  dia ku e tabatin 18 aña.  El a keda akusá di a asesiná e víktima di fam Dunzand dia 18 di desèmber aña 2000 durante un “ happy Hour “ ku tabatin na Fort Waakzaamheid”.

Paulina semper a para riba ku e no ta esun ku a kometé e asesinato.

Promé ku esei e tabata sintando un kastigu di 24 aña pa atrako na Pòmp di gasolin Gasora i tambe intento di asesinato riba un agente polisial.

Durante ku e tabata sintando su kastigu, el a hui for di prizòn i kometé e asesinato na For Waakzaamheid.

Na novèmber 2011 lei di kódigo penal a kambia, kaminda ta bisa ku mester evaluá e kondenado di bida largu, despues di 20 aña, pa mira si e por sali den libertat.

E tribunal konsistí di e 3 huesnan mr. Hubben, mr. Carmelia i mr. Geurts- de Veld ta esnan ku ayera a inisiá e evaluashon.

Mr. Geurts- de Veld ku tabata na kabes, a kuminsá bisando ku henter e dosié  di Paulina ta pèrdí.

Nan a purba di tur manera pa wak si ta haña e dosié den archivo, pero sin resultado. Aparentemente despues ku Paulina a regresá for di Hulanda, e dosié a desaparesé for di den archivo.

Mr Geurts-de Veld a bisa ku esei no ta nifiká ku no por hasi e evaluashon pa e por bai bek den komunidat.

Segun e tribunal, mester  wak  kiko e famia di e víktima   ta bisa i tambe mester por midi si tin peliger pa ora e drenta bek den komunidat.

E tribunal ta di opinion ku resosialisashon mester a kuminsá kaba durante su detenshon.

Segun e evaluashon di rapòrtnan sikiátriko, sikológiko, Reclassering i trahadó sosial, Paulina no tin trastorno mental, no tin trastorno sikopatiko, ni narsismo ni trastorno di personalidat.

Nan a duna di konosé tambe ku ta na desèmber Paulina ta hasi 20 aña será i nan ta tene kuenta ku e dos huidanan ku el a kometé durante su enkarselashon.

E tribunal a bisa di ta tene kuenta tambe ku dia el a  wòrdu detené bek den área di Souax, e tabata den poseshon di arma di kandela. Hues a puntra Paulina kuantu tempu el a keda afó durante su huida, el a bisa ku si e no ta hera mas o ménos 6 luna, pero e no ta kòrda mas riba su pasado, paso e ta konsentrando riba su futuro.