WILLEMSTAD.- Shete “trust’ ku ta ser manehá pa un banko lokal a entamá kaso kontra dje banko lokal, pero tambe Banko Sentral. E trust nan ke nan fondo ku tin riba e banko lokal.
Anteriormente tabatin un sentensia intermediario den ougùstùs di 2019 den e kaso aki. Hues a indiká ku nan por nenga di paga e trust nan of duna nan sèn, si e banko lokal tin duda, ta insigur ku e fondonan dje trust nan ta bini dor di aktividatnan kriminal. Pero pa korte, mester tin un chèns real i hustifiká pa bisa ku e fondo di e trust nan ta bini for di akto kriminal.
E banko lokal a hañ’e den problema ku asuntu di labamentu di plaka aña pasá di algun kuenta bankario ku e tabata manehá. Esaki a trese kuné ku e banko lokal a kometé echo kastigabel, pero a yega na un areglo ku ministerio públiko pa hasi transakshon pa paga e echo kastigabel.
Den kuadro di e transakshon ku OM, e banko lokal a desisti dje fondonan riba e kuenta. A saka e fondonan di e kuentanan for di den e banko. E sobra fondonan riba kuenta mester keda entregá na esnan ku ta doño legítimo di e kuenta of mester depositá esaki den e “consignatiekas” ku ta bou maneho di Banko Sentral.
Ministerio públiko ta spera ku e transakshon ku e banko lokal ta terminá mas lihé posibel dor di kual por lanta e Areglo di Emergensia ku tin riba e banko lokal dor di Banko Sentral.
E trust nan a indiká ku e kuentanan bankario ku e banko lokal a entrega no ta di nan. Pero e banko lokal ta para riba ku esei ta e kaso.
Di akuerdo ku hues e sospecho di OM kontra e banko lokal pa un posibel persekushon penal pa labamentu di plaka relashoná ku fondonan di e trustnan no ta na òrdu mas.
No tin nada pa hustifiká ku e banko no mester paga e trustnan nan fondonan. Pero Banko Sentral i e banko lokal ta para riba ku e trust nan no a dokumentá sufisiente orígen di nan fondo riba e kuenta na e banko lokal.
Hues ta bisa ku banko lokal i Banko Sentral semper por keda riba e duda dje orígen di e plaka. Pero kisas esun ku ta apelá riba e fondo dje trust nan p’e haña, tambe por a bria víktima di akshon polítiko motivá dor di gobièrnu di Rusia.
Korte den e sentensia intermediario a konkluí ku algun di e trust nan a perhudiká e banko lokal dor di no koperá na tempu ku algun prosedura. Dor di esaki e banko a sufri daño. Algun di e trust nan ku no a kumpli ku nan obligashon lo no haña nan fondo. Solamente dos trust ku si a kumpli ku obligashonnan ta haña nan fondo i tambe interes di e periodo di novèmber 2006 pa febrüari 2017. Ademas hues a dikta ku Banko Sentral tin di koperá den pago di e fondonan aki. E trustnan tin di paga gastunan di e prosedura aki.

https://extra.cw/om-no-por-hasi-investigashon-riba-origen-di-plaka-na-banko/