WILLEMSTAD.-  E. Jantje (28)  akusá di a kousa aksidente ku morto  dia 7 di aprel 2018, a keda demandá na mesun kondena di korte di promé instansia, den Hof.

Jantje  a apelá su sentensia di 120 ora trabou pa komunidat mas 6 luna sin reibeweis, pa motibu ku e ta insistí ku ta trata di un aksidente ku por a pasa tur hende i no ta su falta.

E dia  ei  su mihó amiga Raïsha Rationella Offerman, nasé na Hulanda 15 febrüari 1992  a fayesé.

Durante e aksidente e víktima a haña un fraktura na su garganta ku a okashoná su morto. Hues den korte di promé instansia  no a haña ku tabatin sufisiente prueba, ku Jantje ta kulpabel di a kousa morto di e damita, pero si  kulpabel di a kore e vehíkulo di un forma iresponsabel,  i a violá  regla di e bòrchi modèl D2.  E akusado a kore bai banda robes di kaminda i a dal den un vehíkulo ku tabata aserkando, i  tabata inevitabel ku e vehíkulonan a dal den otro ku e konsekuensia fatal.

Jantje ta esun ku tabata stür e vehíkulo i a keda akusá dor di a kore iresponsabel.

Durante tratamentu di e kaso den Hof, el a keda bisa ku no ta kuadra ku el a kore iresponsabel i ta un aksidente a tuma lugá, ku na su pareser ta algu ku por pasa ku tur hende.

Tabata un kaso basta emoshonante, debí ku mama di e víktima ku ta su úniko yu, no por a stòp di yora.

Riba e fecha ariba menshoná alrededor di algu pasa di kuater di mardugá, polis a haña notifikashon ku riba Winston Churchillweg tin un dalmentu entre dos outo i tin vários herido.

Na yegada di e patruya polisial, nan a topa dos (2) outo; outo number 1, un Ford Focus kòrá i outo number 2, Un Scion pretu.

Tabatin total kuater (4) herido (2 hòmber i 2 dama) den outo number 1, ku tabata e outo den kua e víktima a fayesé.

E víktima ku a fayesé tabata sintá banda di e shofùr.

Den e otro vehíkulo, tabatin solamente e shofùr ku a sinti poko doló na su hep. Ku ambulans a transportá tur e sobrá tres (3) víktimanan pa SEHOS e tempu ei, pa tratamentu médiko. Segun investigashon e shofùr Jantje tabata kore riba Winston Churchillweg direkshon Sta. Maria, miéntras shofùr di e otro outo tabata kore riba mesun kaya, pero direkshon Rio Canario.

Segun e prosèsverbal,  Jantje, ku tabata manehá e Ford Focus koló kòrá,  a desviá na su man robes dal frontal kontra di e otro vehíkulo, ku e konsekuensia ariba menshoná.  E akusado a bisa durante tratamentu di e kaso, ku e tabata kore hopi trankil.

E no a bebe, ni huma ni no tabata fuma. El a splika ku direpente el a kuminsá sinti su mes malu i a haña un black out.

Esei a pone ku el a bai na man kontrali i a sinti un klap, ora el a lanta tur kos a pasa kaba.

E otro dama ku tabata den e vehíkulo a bisa ku e ta haña inhustu ku Jantje ta dilanti hues, pa motibu ku ta un aksidente a sosodé i ku nan tur ta víktima den e kaso aki. Mas aleu e testigu a sigui bisa, ku ora e tabata den outo e akusado niun momento so  a kore duru òf iresponsabel.

E tabata den su telefòn ora el a sinti un klap i no sa mas kiko a pasa. El a bisa ku e no a mira nada.  Segun abogado general primu di e akusado ku tabata sintá su tras, a bisa ku Jantje tabata kore basta duru. Na altura di e lusnan di Winston Churchilweg, direkshon Cuba wèg,  el a trata na pasa un vehíkulo ku tabata kore poko poko su dilanti. Riba esaki e akusado a bisa ku niun momento so e loke e primu a bisa, ta kuadra ku bèrdat, pa motibu ku e primu tabata sintá su tras i no por a mira e suseso dilanti.

Abogado general a haña e akusashon probá i  bisa e akusado tabata kore iresponsabel. Mirando esaki, abogado general a bolbe hasi  demanda di 6 luna, 120 ora trabou pa komunidat, mas 6 luna sin reibeweis.