WILLEMSTAD.- E hòmber Z.O. a haña un but di 750 florin pa ponementu di “fever” ku su vehíkulo riba Dokweg.

Korte a redusí e but, pa motibu ku e akusado a pidi Korte despensa i a atmití ku su akto tabata tòf, robes i bobo.

Segun e verbalisantenan, nan tabata yegando den área di Nieuwe Haven, ora ku nan a tende i mira skuermentu di tayer, huma i basta hende para kantu di kaminda.

Ora ku e hendenan a mira presensia di polis, nan a kuminsá bandoná e sitio, pero polis por a mira modèl i kolo di e outo. A bai su tras i dun’e òrdu pa e para, lokual el a hasi tambe. Polis a dun’e e but i a konfiská e vehíkulo.

Fiskal a bisa ku normal e lo a a haña un but di 1.000 florin, pero e bia aki e ta dun’e un chèns i a redusí e but na 750 florin mas un periodo di prueba di 2 aña.

Hues na final a papia seriamente ku e akusado i a mustr’e riba e peligernan ku ponementu di “fever” por trese kuné, tantu pe komo esnan kantu di kaminda. Hues a splik’e ku e bia aki e ta dun’e e chèns, pero si e tin ku bolbe kometé kualke otro infrakshon den tráfiko e tin ku paga tur kos. Tambe e por haña su vehíkulo bèk.