Aksidente entre 3 vehíkulo ku basta daño material

WILLEMSTAD.-Awe mainta tempran a registrá un aksidente di tráfiko riba Sta.Rosaweg na altura di Beurs. Informashon ku EXTRA a risibí na e sitio ta indiká ku 3 vehíkulo tabata embolbí den e aksidente aki ku a keda ku bastante daño material. Testigunan a duna di konosé ku un outo Toyota blanku lo a sali for di Beurs subi kaya miéntras un Daihatsu shinishi tabata bini riba kaya Rignald Recordino for di pariba anto un di tres vehíkulo lo a dal e otro dos outonan pa despues sigui kore bai.

EXTRA a komprondé ku testigunan a saka potrèt di e personanan ku ta den e di tres vehíkulo. Aparentemente lo ta hendenan di aspekto latino ku tabata den e di tres outo, nan a bai wak e kaso pa despues drenta outo i kore bai. EXTRA mester apuntá ku resientemente tambe a konstatá ku hende a kousa aksidente, a baha i wak e situashon pa despues drenta otro outo i bai for di e sitio. Ta bon pa kòrda tur outomobilista ku lei di tráfiko ta bisa ku esun ku bai for di e sitio di aksidente ta kometé akto kastigabel. Keda pendiente ya ku EXTRA ta bini ku mas splikashon.