WILLEMSTAD.- Un shofùr di 59 aña a keda akusá di tabata kore fuma riba St. Rosa wèg.

Polisnan ku tabata den bisindario a tuma nota ku e vehíkulo tabata kore zig- zag riba kaminda. Esei a pone nan a para e shofùr pa hasi un kontròl.

Na momento ku e agentenan a yega serka nan a tuma nota ku e shofùr su wowonan tabata basta kòrá i tabatin tur indikashon ku e tabata bou di influensia di alkohòl.

Mirando esaki e agentenan a poné para riba un pia, lag’e pone un dede na su nanishi i otro pruebanan, pa tèst si e akusado tabata fuma i ku e tabata den posishon di manehá un vehíkulo.

Segun e prosèsverbal di polis, niun di e prueba nan aki e shofùr no a pasa ku éksito.

Durante tratamentu di e kaso e shofùr a atmití ku e tabata bou di influensia di alkohòl riba e dia en kuestion.

E shofùr a splika ku el a bebe un kantidat basta di wiski serka algun persona ku el a bai serka dje.

Na polis el a deklará ku el a bebe solamente 1 kùp di wiski.

Pero a base di e prueba nan ku polis a lag’é hasi, por a konkluí ku el a bebe mas di loke el a bisa.

Fiskal a haña e akusashonnan probá i a demandá e akusado na 1000 florin di but di kual 750 kondishonal ku un periodo di prueba di 3 aña.

E akusado a bisa ku su situashon finansiero ta hopi difísil i ku e no por paga e suma den un tiru.

El a splika ku su mama ta e úniko ku por bai yud’é, mirando ku e mes no tin trabou.

Hues a duna di konosé ku e ta apresiá ku e akusado a bin korte pa asumí su responsabilidat i ku el a kapta e mensahe, pa motibu ku el a bisa ku nunka mas el lo bolbe hasi algu asin’aki.

Hues a splika ku tin basta shofùr sin distinshon di klase, ku ta kore outo bou di influensia di alkohòl, tresiendo otro hende su bida na peliger.

Hues den su desishon a bai di akuerdo ku e demanda di fiskal i a bisa ku e lo tene kuenta ku e akusado su situashon finansiero. Esei a pone ku el a proponé na e akusado, ku e por paga e but den término di 5 luna e montante di 250 florin.

Si den e tres aña e akusado no bolbe kometé infrakshon di tráfiko, e no tin ku paga e 750 florin mas.

E akusado a bai di akuerdo ku loke hues a proponé.