WILLEMSTAD.- Un shofùr ku a kore outo bou di influensia di alkohòl, mester paga 1000 florin di but. Ta trata di un shofùr di 63 aña ku ta keda akusá di a kore su outo fuma.
Despues ku polisnan a par’é pa un kontròl, nan a tuma nota ku e shofùr su wowonan tabata basta kòrá, lenga pisá, hole alkohòl.
Pa sali fo’i duda, e agentenan a hasi algun prueba ku e shofùr, entre otro poné para riba un pia, pone su man na su nanishi i otro pruebanan, pa tèst si e tabata fuma i tabata den posishon di manehá un vehíkulo.
Segun e prosèsverbal di polis, niun di e pruebanan e shofùr a pasa ku éksito.
Durante tratamentu di e kaso, e shofùr ku a presentá den sala di korte, pa asumí su responsabilidat i a atmití ku en bèrdat e tabata bou di influensia di alkohòl e dia enkuestion.
E shofùr a splika ku el a sali un wega di dominó ku algun amigu i a dal par di beter. E no tabata sinti su mes fuma, p’esei a kere ku e por a kore outo bai kas.
Na polis el a deklará ku el a bebe solamente 1 kùp di wiski. Pero a base di e pruebanan ku polis a lag’é hasi, por a konkluí ku el a bebe mas di loke el a bisa.
Fiskal a haña e akusashon probá i a demandá e akusado na 1000 florin di but di kual 750 florin kondishonal, ku un periodo di prueba di 3 aña.
E akusado a bisa ku su situashon finansiero ta hopi difísil i ku e no por paga e suma den un tiru.
Hues a duna di konosé ku e ta apresiá ku e akusado a bin korte pa asumí su responsabilidat i ku el a komprondé e mensahe, pa motibu ku el a bisa ku nunka mas e lo kometé un echo asin’aki.
Hues a splika ku tin basta shofùr sin distinshon di klase, ku ta kore outo bou di influensia di alkohòl, tresiendo otro hende su bida na peliger. Hues den su desishon a bai di akuerdo ku e demanda di fiskal i a bisa ku e lo tene kuenta ku e akusado su situashon finansiero i a proponé na e akusado, ku e por paga den término di 5 luna e montante di 250 florin.
Si den e tres añanan e no kometé infrakshon di tráfiko, e no tin ku paga e 750 florin mas. Tantu e shofùr i fiskal a distansiá pa bai den apelashon.