WILLEMSTAD.- Un situashon insolito mester bisa ku a tuma lugá ayera ora ku un shofùr di taksi no por a kontené su mes i a agredí un turista, simplemente pa e echo ku e no tabata ke a keda transportá den taksi, pero e tabata ke a hasi uso di servisio di bùs, esta simplemente bùs ku ta kore ku hende lokal. Giovannie Decaster di STO, ta di opinion ku awor si shofùrnan di taksi a bai hopi leu.
Tur kos a kuminsá ora ku un grupo di 30 turista ku a baha for di barku ayera, a kana keiru wak Punda i a topa ku un shofùr di bùs. Nan a kombersá ku e persona aki i a puntra pa su servisio i nan tur tabata ke a hasi uso di e bùs pa bai Mambo.
Pa hiba tur e hendenan aki, e shofùr di bùs mester a kore algun biaha bai bin.
E shofùr a bai di akuerdo pa duna e turistanan su servisio. Ora ku e shofùr tabata bai buska e último grupo na Punda, el a topa ku algun shofùr di taksi ku a kuminsá heringá kuné i blòki’e ku e no por a bai Punda pa e por a buska e último grupo.
E ta logra maniobrá i e ta bai Punda i hiba e último grupo.
Aki e problema a eskalá te asta un di e shofùrnan di taksi a agredí un turista malamente.
E loke ku a sorprendé e turistanan mas tantu ta ku tabatin un polis na e sitio, pero no a hasi nada.
E turistanan ta señalá e polis ta kua ta e shofùr di taksi ku a agredí e turista en kuestion, pero el a bisa e turistanan pa bai Otrobanda i entregá keho.
Ora ku nan a bai Otrobanda, e polisnan a manda nan Mambo na Politur. A buska Politur, pa atendé ku e keho, aki e polisnan di Politur tambe lo mester a hala atras i bisa ku ta serka e polis ku tabata na Mambo mes nan mester ta, pa entregá keho. Esaki ta loke ku Presidente di STO Giovannie Decaster a duna di konosé na EXTRA.
Decaster a bisa ku simplemente esaki ta un mal nòmber pa Kòrsou. Djis pa motibu ku e turistanan no tabata ke a hasi uso di e servisio di taksi, un shofùr di taksi ta Sali i agredí un di e turistanan.
Decaster ta haña ku awor si shofùrnan di taksi a bai hopi leu.
E grupo di turista mester a para mira kon un shofùr di taksi ta agredí nan miembro di famia i sin nada ta sosodé.
Decaster ta spera ku ounke ku niun polis no a tuma e keho na man di e turista, ku tòg hustisia prevalesé i polis atendé ku e shofùr di taksi na e forma debido.
sprock renfred
hopi mahos e kos aki ta. E polis ku e turista a aserka no a hasi su trabao korekto. E mester a atende e kaso direkt wak en berdat kiko a pasa i sin tin testigu ku e shofer a dal e turista maske ta un wanta e mester a detene e chauffeur al instante i hibe e warda di mas serka ku ta Wijkteam Punda i yama un hovj. Ta asina polis mester ta traha i no e stail di bula pipa. Si altu mando di polis no tuma akshon e lo bira peor.