Ora ku e tabata bayendo bai buska pasahero

WILLEMSTAD.- E hòmber R.C. (57) a presentá den sala di korte pa responsabilisá su mes pa kore bùs fuma ku pasahero aden. Banda di esaki el a haña su mes den un aksidente, pero e no ta akusá di e echo aki.

Segun Ministerio Públiko, dia 5 mei último, polis a laga e akusado supla den e mashin, despues di a sospechá  ku e tabata bou di influensia di alkohòl. Despues ku el a supla, e mashin a midi 745 ugl den su sistema ku ta kasi 4 bia e kantidat di alkohòl ku lei ta permití pa un persona manehá outo ku alkohòl den su sistema.

Durante e deklarashon, e akusado a bisa ku el a bebe mitar bòter di ròm ku cola e dia ei fo’i na kas.

E tabata bayendo pa buska algun persona den un bùs  di “tour” ora ku el a aksidentá  riba kaminda di Montaña. Pero el a splika ku no tabata su falta. Ta un vehíkulo a lora bin dal den dje.

Wes ta remarká ku for di einan e tabata fuma i a sigui kore ku e bùs pa bai buska hende, sabiendo ku e tabatin basta alkohòl den su sistema.

Polis a skibi den e prosèsverbal ku e akusado a kana zuai  drenta outo.

Segun e akusado, e tabatin kanser i p’esei e tabata bebe hopi paso e tabata hopi preokupá ku e malesa. E ta lamentá e echo inmensamente.

Awor ku el a operá, el a kura di e malesa, ta mas mihó i  no ta bebe mas.

E dia ei polis a kita su reibeweis di kual el a haña esaki bèk despues di 3 luna. Segun e akusado, fo’i dje dia ei e no tin trabou mas. Ta su señora so ta traha .

Fiskal a pidi 2 mil florin di but, di kual 500 florin kondishonal.

Banda di esaki e ta haña 200 dia di kual 94 kondishonal sin su reibeweis.

Wes a tene kuenta ku e situashon personal di e akusado i a bai di akuerdo ku e demanda di fiskal.

Wes a bis’e debí na su situashon finansiero, e por paga 100 florin den un término di 15 luna.