WILLEMSTAD. - Abitantenan i skolnan den Julianadorp ta kontentu ku despues di añanan ta hala atenshon a honra e petishon pa pone bòrchi pa prohibí trùknan di karga pisá, dor di Minister di Tráfiko, Transportashon, i Planifikashon Urbano (VVRP). Desde kuminsamentu di desèmber 2022, tin bòrchi ku ta prohibí tráfiko di karga pisá na tur tres entrada di Julianadorp.

Desde algun aña pasá den kuadro di trabounan di konstrukshon di e rotòndenan riba Jan Noorduynweg, e entrada di St. Michielsweg riba Kaminda Dr. Amado Römer (kaminda pa Bullenbaai) a wòrdu ‘temporalmente’ habrí i a keda usá dor di tráfiko di konstrukshon pisa for di rotònde Helmin Magno Wiels Boulevard / Jan Noorduynweg den direkshon pa Bullenbaai, Mal País, Curasol, Boca Sami, Jan Doret, Sint Michiel, i visevèrsa. E kantidat di aktividatnan den e barionan menshoná manera aktividatnan di konstrukshon na Blauwbaai i trabounan na Bullenbaai ta kousa fluho kontinuo di tráfiko pisá. Ounke e entrada via di St. Michielsweg na banda di Kaminda Dr. Amado Römer tabata intenshoná pa ta temporal, e seramentu di esaki nunka a tuma lugá.

Naturalmente, tin benefishinan pa e entrada aki keda habri. Pa mayornan ku diariamente ta hiba i trese nan yunan skol den Julianadorp (Schroederschool, de Goiloschool, o Vespucci College), ta skapa di tin ku pasa via di e entrada serka di Centrum Supermarket. E tráfiko di outo aki no ta asina un problema, basta ku tin atenshon na límite di velosidat. Kontrali na e outonan, e tráfiko di karga pisá si ta un kuestion. E trùknan ta kousa riesgo di siguridat grandi pa mucha i hende grandi ku ta kana den bario, kore baiskel i ta krusa kaminda i ta kousa hopi molèster di zonido. Un otro konsekuensia ta ku e kaminda ta keda tur kibrá.

Desde ku a pone e bòrchinan pa prohibí tráfiko di karga, por nota ku algun shofùr ta respetá e regla di tráfiko aki. E abitantenan den Julianadorp i e representantenan di e skolnan ta kontentu ku esaki i ta masha agradesido na nan.

Pero tin algun shofùr ku no ta aster nan mes i ku velosidat hopi haltu i ku hopi dezòrdu ta drenta sali sea bashí o yen, kargá ku pieda, santu, sushi di konstrukshon, etcetera.

Atrobe, ta bai un petishon na e shofùrnan di tráfiko di karga: pa hasi uso di e kareteranan pafó di e bario, pues Helmin Magno Wiels Boulevard i Kaminda Dr. Amado Römer. E kareteranan aki ta traha pa tráfiko pisa.

E realidat di Kòrsou ta, ku tin hopi aktividatnan di konstrukshon ta tumando lugá i esaki ta hasi tráfiko mas drùk. E ekspektativa ta ku e añanan binidero esaki lo subi. Purba di tene kuenta ku otro i evitá mas tantu aksidente i molèster posibel, sigur den besindat di skolnan.

Na nòmber di e abitantenan i e representantenan di skolnan na i rònt di St. Michielsweg,