WILLEMSTAD.- Korte a baha fuerte pa un shofùr ku a dal dos dama ku tabata kana kantu di kaminda.

Ayera Korte di Promé Instansia a trata kaso di e sospechoso A.R.R.E. (1977, Colombia) pa motibu ku el a dal dos peaton. Nan tabata kana na kantu di kaminda riba Rooseveltweg riba 10 di novèmber 2018 alrededor di 8 or di anochi. A.R.R.E. tabata  bou di influensia di alkohòl. Ambos peaton a risibí basta sla na pia i kabes.

Fiskal a indiká ku e shofùr ta kulpabel. Mirando ku ta dos víktima el a dal, i tabata fuma, el a oumentá e demanda di kastigu na un kastigu di trabou di 240 ora i 24 luna ku e sospechoso no por manehá un vehíkulo. Tambe fiskal a pidi pa hues otorgá e petishon di e dos víktimanan pa daño i perhuisio di NAF. 7839,- i NAF. 2500,-.

Segun fiskal e damanan tabata kana kantu di kaminda i no tabata krusando manera e sospechoso a deklará, i kual no tabatin indikashon di esaki. Ora a pidi kastigu a tene kuenta ku mas infrakshon ku e sospechoso a hasi su mes kulpabel na dje. E no tabatin reibeweis, seguro bálido, karchi di kùr ni a paga belasting di outo.

Hues a husga di mes manera i a disidí kondená e shofùr na un kastigu di di 200 ora di trabou i 20 luna ku e sospechoso no mag kore un vehíkulo. E petishon di e víktimanan tambe a wòrdu otorgá.