WILLEMSTAD.-Ayera Shofùr ku a kousa aksidente ku morto  riba Wèg naar Westpunt dia 4 di febrüari último, na altura di Zegu a keda pone den libertat. Esaki pendiente pa mas investigashon. Su abogado mr Eisden a trese vários punto dilanti entre nan su kondishon personal. Abase di artíkulo  111 i 113 hues komisario no a haña ku tin mas motibu pa tene e shofùr aki sera.

Riba e fecha menshoná polis  a bin topa un aksidente entre 3 vehíkulo i di kual un di nan su shofùr tabata den un estado kritiko.

For di un investigashon preliminar realisá na e sitio, a sali na kla ku shofùr di un SUV ku tabata kore riba e kaminda en kuestion den direkshon di Banda Bou, pa motibunan deskonosí a bai kore riba su man kontrali i dal praktikamente frontal kontra un outo di famia ku tabata kore riba e mesun kaminda ei den direkshon di e plenchi di tráfiko Zegu.

E outo aki a bai kai k

antu di kaminda i e shofùr a keda pegá den su outo.

Ku yudansa di brantwer a saka e víktima aki, ku ya no tabata duna señal di bida mas.

Dòkter di polis na e sitio mes a konstatá morto di Rodney Davis Siegmar Ogenia, nasé na Kòrsou dia 23 di yüli 1983.

Debí na e impakto fuerte aki, e SUV a zuai i bai dal den banda robes di un otro vehíkulo ku tambe tabata bayendo den direkshon di plenchi di tráfiko na Zegu.

Ambulans a transportá shofùr di e SUV ku a sufri algun herida pa poliklínika. Ayera hues komisario a pone vários kondishon pa e shofùr promé ku el a rekobrá su libertat. Entre otro ku e mester ta disponibel pa hustisia i su abogado ora esaki ta nesesario. Tambe e mester entrega su reibeweis i ku e no mag di kometé niun echo kastigabel. E kaso ta sigui den investigashon pendiente su tratamentu den korte.