WILLEMSTAD.-  E shofùr  B. Plantijn  (26) a sali hopi di bon for di un kaso di  ponementu di “fever” ku Ministerio Públiko a akus’é di dje.

Segun e akusashon dia 11 di desèmber 2020 Plantijn tabata pone “fever” riba kaminda públiko i remarkabel tabata ku el a hasié banda di warda polis Rio Canario.

E agentenan a bisa ku nan tabata na warda ora nan a tende zonido di skuermentu di tayer. Ora nan a sali wak , nan a mira huma ta bai laira i tambe por a sinti holó di tayer kimá.

Segun polis e loke e akusado tabata hasi ta parse un provokashon kontra nan i ora e shofùr a mira nan, el a trata na kore bai.

Mes ora e agentenan a tuma akshon i a logra para e shofùr. Nan a mustr’é riba su komportashon indikando ku  loke e ta  hasiendo ta peligroso pa e mes i  pa otro  riba karetera. Mirando tur esakinan el a haña  un but i a kita e vehíkulo fo’i dje, pa motibu ku banda di pone “fever”, e papelnan di e outo no tabata na òrdu.

Dia 30 desèmber el a manda un mail indikando ku tur papel tabata reglá. Miéntras tantu el a haña su outo bèk.

Na polis e akusado a bisa ku e ta sa ku e tabata hasiendo robes i nunka mas e lo hasi algu asin’aki.

Fiskal a haña e akusashon probá i a demandá e shofùr na 400 florin di but.

Hues den su desishon no a mira motibu pa desviá i a bai di akuerdo ku e demanda di fiskal.