WILLEMSTAD.- Korementu di outo fuma no ta wòrdu tolerá pa hustisia den niun sentido di palabra. Esei a wòrdu bisá na vários okashon den korte durante kasonan di infrakshon di tráfiko.
Un shofùr di 49 aña a keda kondená na 1400 florin di but, pa kore outo bou influensia di alkohòl.
Durante tratamentu di su kaso e no a presentá den sala di korte pa asumí su responsabilidat.
Durante un kontròl ku polis a tene riba korementu di outo bou di influensia di alkohòl, nan a para e shofùr i a tuma nota ku su wowonan tabata glas glas, kòrá i tabata mustra basta kansá i fuma.
Holó di alkohòl fuerte tambe tabata manifestá serka e shofùr.
Esaki a pone ku polisnan a poné supla pa midi e kantidat di alkohòl ku e tabatin den su sistema. A resultá ku e tabatin mas ku dòbel di e kantidat ku lei ta permití.
Na polis e akusado a bisa ku bèrdat el a bebe un kantidat di ròm i likùr i tabata basta fuma.
Hues a splik’é ku no ta prohibí pa un persona bebe, pero e no por pasa e límite di alkohòl ku lei ta preskribí pa un shofùr por kore outo.
Mirando ku e akusado no a presentá pa responsabilisá su mes pa su akto, fiskal a hasi un demanda di 1400 florin di but pa kore outo bou di influensia di alkohòl i si e no kumpli ku e pago e por bai resultá den prizòn.
Hues den su desishon a bai kompletamente di akuerdo ku fiskal.