WILLEMSTAD.- Bistimentu di faha di seguridat ta un obligashon pa tur outomobilista i tambe pasaheronan den e vehíkulo.

Vários okashon tabatin diskushonnan kon e faha mester wòrdu bistí.

Hues a yega di splika ku ta un manera korekto so tin pa bisti e faha i esei polis ta wak durante kontròl di tráfiko.

Resientemente den un kaso di infrakshon di tráfiko, e echo aki a bolbe bin dilanti.

Un shofùr ta keda akusá di no tabatin su faha di seguridat bistí, ora ku polis a par’e riba Nieuwe Haven.

E shofùr a splika ku el a bin korte pa motibu ku e no ta  di akuerdo ku e but.

El a bisa ku e tabatin faha bistí, pero a push’é bou di su brasa.

Riba esaki hues a bisa e akusado ku si e no ke bisti e faha, e mester pidi un dispensashon pa ku esaki.

El a bisa ku no ta asina ku e no ke bisti e faha, pero ku e tabatin su motibu dikon el a bistié di tal forma e dia ei.

Fiskal a haña e akusashon probá, pero a bisa ku e ta tene kuenta ku e shofùr no ta trahando aworakí pasó el a pèrdè trabou.

Esaki a pone ku fiskal a yega na un demanda di 300 florin di but di kual 200 kondishonal.

Hues den su desishon a kondená e shofùr na 250 florin di but di kual 150 kondishonal ku un periodo di prueba di 1 aña.

Hues a splik’é ku si e bia aki polis bolbe par’é ku e faha mal bistí, e tin ku paga tur kos.