WILLEMSTAD.- E shofùr akusado di 23 aña ku a kousa aksidente frontal na altura di ántes  Alaska Snek, a keda demandá na 70 ora di trabou pa komunidat i si e no hasié 35 dia será. E ta keda akusá ku dia 23 di yanüari 2019 el a okashoná un aksidente di kual e víktima mester a bai hospital. E vehíkulo no tabatin niun dokumento i tampoko reibeweis. Banda di esaki e akusado tin mas di 2000 mil florin di but habrí.

El a presentá djarason den sala di korte i a bisa ku e víktima tabata pone ‘fever’ p’esei el a dal den dje. E daño di e outo di kontra partido tabata konsiderabel di kual e víktima a eksigí 45 mil florin di daño perhuisio. E akusado a bisa ku e tampoko no a keda kontentu pasó su outo tambe a haña hopi sla.

Banda di esaki hues a bisa e akusado ku e no tabatin plachi number korekto tampoko riba e outo, tur kos a bai kompletamente robes pe e dia ei. Relashoná ku tur esakinan fiskal ta haña ku trabou pa komunidat ta mihó pa  akusado den e kaso aki mirando e kantidat di but ku e tin habrí.

Fiskal ta hasi demanda di 70 ora di trabou pa komunidat i si e no hasié 35 dia será. E kier a pidi pa imponé 6 luna sin reibeweis, pero mirando ku e akusado ta bezig pa saka su reibeweis el a deshasí for di e idea. Tambe fiskal a pidi 3 aña di prueba.

Pa loke ta trata e plachi number ku e akusado tabatin riba e outo ku no tabata kuadra ku su vehíkulo, el a bisa ku el a kaba di kumpra e outo i p’esei e tabatin un otro plachi number pa kore yega su destino. Hues den su desishon no a mira motibu pa desviá i a bai di akuerdo ku fiskal.