Shofùr rabiá pasó el a haña but pa dokumento inválido di outo fiá

WILLEMSTAD. - Na vários okashon fiskal durante kasonan di infrakshon di tráfiko, a splika bon kla ku mester kontrolá tur papel di e vehíkulo promé ku subi kaya kuné, aunke e no ta di esun ku ta bai kore.
Esaki un bia mas tabata un kaso durante di infrakshon di tráfiko, na momento ku e shofùr a bai korte basta rabiá, despues ku el a haña un but, pa motibu ku e tabata kore un vehíkulo ku su dokumento di kùr no tabata na òrdu.
El a splika ku el a fia e vehíkulo serka un hende i no tabata sa ku e dokumento no tabata na òrdu.
Durante kontròl di tráfiko polis a para e shofùr i ora e agentenan a konstatá ku e dokumento no tabata na òrdu, el a haña un but.
Fiskal a splika e shofùr ku normalmente e but aki ta kosta fl225,-.
E shofùr a bisa ku e no tin trabou i ta risibí un kompensashon, despues ku el a haña un aksidente i afektá su brasa.
Fiskal a bisa di lo tene kuenta ku esaki i ta demandá e shofùr na e suma ariba menshoná pero kompletamente kondishonal mas 2 aña di prueba.
Esaki ta nifiká ku si e shofùr bolbe kometé un infrakshon den tráfiko durante di e dos añanan binidero, e tin ku paga e but aki mas esun nobo ku e haña.
Hues den su desishon no a mira e motibu pa desviá for di e demanda di fiskal i a bai kompletamente di akuerdo ku esaki.