WILLEMSTAD.- Den un kaso masha pekuliar resientemente un shofùr di 52 aña a risibí un but di 1250 florin di kual 750 kondishonal, pa korementu di outo fuma.

Segun e prosèsverbal, e akusado a kore outo di tal forma ku el a dal den e bòrchinan di tráfiko ku tabatin riba kaminda.

Na momento ku polisnan a presentá na e sitio, nan a bisa di a mira ku e shofùr lo por a hasi mal uso di alkohòl.

Esaki a pone ku nan a hasi e pruebanan nesesario pa konfirmá e sospecho i a resultá ku e akusado no por a para riba un pia, tabatin lenga pisá i su wowonan tabata basta kòrá.

E akusado a atmití di a dal algun beter na un sitio ku el a bishitá huntu ku algun amigu.

El a bisa e no tabata sintié asina fuma p’esei  e mes a opta pa stür bai kas.

Segun e akusado, na kaminda kansansio i soño a hunga un ròl poniendo ku e no a mira e bòrchi i a kore bai pega den dje.

Fiskal a haña e akusashon probá i a demandá e akusado na 1250 florin di but di kual 750 kondishonal ku un periodo di prueba di 3 aña.

E shofùr den su último palabra a primintí ku e lo kumpli ku e pago i tambe ku e lo sòru pa nunka mas e hañ’é den un kaso asin’aki.

Hues den su desishon a bisa ku e no ta mira motibu pa desviá for di e demanda i ta bai kompletamente di akuerdo.