Siudadano ta mira 23.000 florin pasa bou di su nanishi

WILLEMSTAD. - Resientemente Korte den kasonan di derecho Sivil den Apelashon a dikta fayo den un kaso remarkabel. Ta trata di un disputa ku a surgi entre di un siudadano i gobièrnu despues ku e siudadano a aksidentá ku su outo riba Jan Noorduynweg i ta ‘claim’ ku no tin bòrchi ku ta indiká ku e outomobilista ta aserkando asera mei mei di kaya. Esaki ta pone ku e siudadano ta di opinion ku el a aksidentá su outo pa motibu di gobièrnu su inkumplimentu. Pues no  tin un bon indikashon ku linia pintá riba kaya ta kambia pa asera di 18cm haltu.

Den Korte di Promé Instansia e siudadano ta gana e kaso kaminda ku e hues ta konkluí ku en bèrdat no tin indikashonnan ku ta alertá outomobilista nan ku ta bin asera i esaki ta haltu di manera e shofùr por tene kuenta ku esaki.

Hues den Korte di Promé Instansia a pone ku Gobièrnu mester paga e siudadano 24.440 florin.

Gobièrnu a apelá e veredikto pa motibu ku nan no ta di akuerdo ku e konklushon di e promé hues.

Ta trata di e situashon riba Jan Noorduynweg na altura di e sentro komersial. Kaminda ku e kaya ta kambia di strepi pintá i bira asera ku un altura di 18 cm. Tabata anochi ora ku shofùr tabata move riba e kaya aki ku un dado momentu a haña su mes den un situashon ku e mester a desviá, loke ku a pone ku el a dal den e asera i despues basha un palu di lus abou. E shofùr su outo a sufri daño material konsiderabel i tambe el a sufri leshonnan.

Segun su deklarashon, si tabatin bòrchi i òf mihó indikashon, e lo a buska un otro solushon, ora ku el a haña su mes den e situashon enkuestion.

E shofùr aki a ‘claim’ ku e loke ku a pasa kuné ta pa falta di limitashon di lus, no tin bòrchi ku ta indiká ku e linianan a stòp i bira asera.

Manera menshoná den Korte di Promé Instansia e ta haña rason, pero den apelashon e kosnan a kambia basta.

Gobièrnu a trese dilanti ku a konstruí asera pa mas seguridat i evitá aksidente di tráfiko, loke ku nan a logra hopi bon. Na opinion di Gobièrnu t’asina ku e asera bisto ku shofùrnan mester tuma nota ku nan ta aserkando asera.

Despues ku e tribunal a studia tur e rapòrtnan di polis di tráfiko, ForenSys i un dado momentu deklarashon di e shofùr mes a krea duda, e pone ku e tribunal ta konkluí ku ounke ku en bèrdat gobièrnu ta responsabel pa bon indikashon ku bòrchinan, ku ta alertá riba kambio.

Pero den e kaso spesífiko aki korte ta konkluí ku e shofùr no tabata atento i sierto deklarashonnan di dje no ta konfiabel.

Esaki a pone ku den apelashon e ta pèrdè kaso i asina e ta mira kon 23.440 florin ku el a ‘claim’ a pasa bou di su nanishi bai.