WILLEMSTAD.-    Un shofùr ku a presentá na korte, a duna dos diferente deklarashon. Esei a pone ku fiskal no a kere den loke el a konta den sala di korte i a dun’é but tòg.

Durante kasonan di infrakshon di tráfiko, e shofùr a presentá, despues ku el a haña but pa kore outo sin reibeweis.  El a bisa ku e no ta di akuerdo ku e but ku el a haña.

Segun e prosèsverbal, polis a para e hòmber aki pa un kontròl, i el a splika  ku e tin su reibeweis, pero a lag’é na kas e dia ei. Durante tratamentu di e kaso, hues a puntra e akusado si e tin su reibeweis kuné. Despues ku hues a wak esaki, el a tuma nota ku e shofùr a saka su reibeweis, despues ku polis par’é.

Hues a keda straño, pa motibu ku akusado a bisa di a laga su reibeweis na kas, pero e fecha ku el a tuma su reibeweis na kranshi, ta kasi un luna despues.

E akusado a duna di konosé na hues, ku el a bisa polis ku el a pèrdè su reibeweis i despues a bai sak’é di nobo.

Fiskal a bisa ku e no ta kere nada di loke e shofùr ta deklará, pasó e ta papia dos kos diferente. E ta kere ku e shofùr no tabata dispon’é di un reibeweis i despues a bai sak’é.  Mirando esaki e ta  duna e akusado un but di 50 florin, pa no tabatin su reibeweis huntu kuné na momento ku e tabata manehá un vehíkulo. E ta tene na kuenta ku e akusado a bai atendé su reibeweis despues di a haña but.

Hues den su desishon a bai kompletamente di akuerdo ku demanda di fiskal.