WILLEMSTAD.- Durante un kaso di infrakshon di tráfiko, kaminda un shofùr a haña but, pa motibu ku e tabata transportá pasaheronan komo taksista, pero sin pèrmit, hues a bisa e akusado, ku e tabata peligrá bida di e pasaheronan.  Ta trata di un hòmber ku a atmití di tabata kore ilegal  transportando pasaheronan, usando su vehíkulo personal, pa motibu ku e no tabatin trabou.

Esaki segun korte ta sumamente peligroso, komo ku e pasaheronan den un kaso asina no ta sigurá ora nan drenta un taksi ilegal. Korte a konsiderá esaki  tambe komo un forma di kita pan for di un otro shofùr, ku si tin un pèrmit pa kore taksi i tin dokumentonan na òrdu.

Fiskal a bisa ku e personanan aki si tin ku demonstrá ku nan tin tur kos na òrdu i tin ku paga pa nan pèrmit di taksi. Banda di esei, nan tin ku paga un seguro pa nan pasaheronan.

Fiskal a hasi un demanda di 750 florin di but, di kual 500 florin kondishonal i dos aña di prueba. Fiskal a tene kuenta ku e akusado su karchi di kastigu ta blanku i e echo ku e no tin trabou.  Hues den su desishon a papia serio ku e akusado i a splik’é e konsekuensianan di su echo i pa evitá di hinka su mes den problema. Na final hues a bai kompletamente di akuerdo ku e demanda di fiskal.