WILLEMSTAD.- Korte a tene konsiderashon ku un shofùr ku a bin splika, dikon e no tabatin su faha di seguridat bistí, na momento ku polis a par’é.
Ta trata di e shofùr F.G. (61) ku ta keda akusá di a kore outo sin su faha di seguridat.
Durante kasonan di infrakshon di tráfiko, e akusado a presentá pa asina trese su desakuerdo dilanti hues, despues ku el a haña e but.
El a splika ku riba e dia ei, el a sali kas i a bai e toko ku ta keda mas o ménos 500 meter for di su kas, pa einan e kumpra pan.
Segun e akusado, nèt e momento ei el a haña un doló straño bou di su barika i no por a bisti su faha di seguridat. Ora ku e tabata kasi yega na e toko, el a dal den un kontròl di tráfiko i e agente a dun’é un but.
El a bisa di ta aseptá ku e no tabatin faha di seguridat bistí i ku e tin ku paga pa su fayo.
Mas aleu el a duna di konosé ku e kier a bai ofisina di Paga bo but na Skalo pa paga su but, pero a bis’é pa bin regl’é den korte.
Fiskal a duna di konosé na e akusado, ku si e lo a pag’é na e ofisina, e lo a kost’é 225 florin, pero debí ku el a bin korte, e tin ku paga e montante di 300 florin.
Fiskal a bisa ku e ta tene kuenta tòg ku e akusado i ta dun’é e but di 300 florin, di kual 150 kondishonal, ku un periodo di prueba di 1 aña.
E akusado a bisa ku nunka promé el a haña un but den su bida i ku esaki sigur a lag’é siña di su fout. Hues den su desishon a bai di akuerdo ku e demanda di fiskal.