WILLEMSTAD. - Manera ayera EXTRA a publiká ku e sindikato di shofùrnan di bùs STO ku ta presidí pa Giovanni Decaster, a duna di konosé ku nan no por komprondé kon Minister Zita Jesus-Leito ta sera e bañonan ku tabata habrí tantu na Punda i Otrobanda i tene esakinan será.

Segun STO, nan a komprondé ku a laga sera e bañonan pa motibu ku problema ku esunnan ku mester tene e bañonan limpi.

Pa kita e problema ei for di riba mesa, STO a ofresé ku nan por tene e bañonan limpi nan mes i sin kosto, esta grátis, pero pa nan sorpresa Minister Jesus-Leito a nenga nan oferta.

Esaki a pone ku ayera algun shofùr di bùs huntu ku Decaster a bai na e sitio i protestá dilanti e baño será na Otrobanda.

For di 31 di desèmber tras di lomba e bañonan ta será tantu na Otrobanda i Punda ya tin algun luna será kaba i e shofùrnan no tin lugá pa hasi nan nesesidat.

P’esei e shofùrnan di bùs ta di opinion ku si minister stima e pueblo aki, e lo mester laga habri e bañonan.

E shofùrnan di bùs ta spera riba un reakshon pronto di Minister pa habri  e bañonan.